भदौ दोस्रो साताबाट आन्दोलन गर्ने शिक्षक महासंघको निर्णय

काठमाडौं । नेपाल शिक्षक महासंघले भदौ दोस्रो हप्ताबाट पुनः आन्दोलन गर्ने भएको छ । आज बसेको महासंघको बैठकले भदौ दोस्रो सातादेखि आन्दोलन गर्ने निर्णय गरेको हो ।

साथै, महासंघले राष्ट्रिय समितिको पूर्ण प्रत्यक्ष बैठक भदौ ३ र ४ गतेका लागि बोलाएको अध्यक्ष लक्ष्मी किशोर सुवेदीले जानकारी दिए । उनका अनुसार सरकारले सहमति कार्यान्वयन नगरेको भदौको दोस्रो सातादेखि आन्दोलन गर्ने निर्णय पनि बैठकले गरेको छ ।

उनले भने, ‘आन्दोलनको कार्यक्रम आन्दोलन परिचाल समितिले खाका तयार गर्छ। र राष्ट्रिय समितिले पारित गरेपछि दोस्रो साताको सुरुबाटै गर्नेगरी सार्वजनिक गर्छौँ ।

सुवेदीका अनुसार शिक्षा विधेयक पारित गर्न अविलम्ब गरे र शिक्षक महासंघसँग विगतमा भएका सहमतिलाई लत्याउने काम भएको खण्डमा महासंघ आन्दोलनमा जाने निर्णय भएको हो ।

भदौ ३ र ४ गते महासंघको बैठकले आन्दोलनको मोडालिटी तयार गर्ने उनले बताए ।

साथै यसबिचमा महासंघको आन्दोलन परिचालन समितिले आन्दोलनका विभिन्न ऐजन्डा प्रस्ताव गर्ने उपयुक्त प्रस्ताव अनुसार राष्ट्रिय समितिले आन्दोलनको मोडालिटी तय गर्नेछ ।

शिक्षा ऐन जारी गर्नुपर्ने मागसहित यसअघि नै शिक्षक महासंघको अगुवाइमा शिक्षकहरुले लामो आन्दोलन गरे । तर सरकारले शिक्षा ऐन जारी गर्ने सहमतिसहित शिक्षकहरुले आन्दोलन रोकेका थिए । तर विधेयक पारित गर्न ढिलाइ भएपछि पुनः आन्दोलन गर्ने भएका हुन् ।