शिक्षामन्त्रीको एजेण्डाः इसिडी शिक्षक र विद्यालय कर्मचारीको पारिश्रमिक १९ हजार ५ सय पुर्याइने !

एजुकेशन समाचार चैत्र १६, २०८२ ११:४३

काठमाडौं । शिक्षा, विज्ञान तथा प्रविधि मन्त्री सस्मित पोखरेलले इसिडी शिक्षक र विद्यालय कर्मचारीको पारिश्रमिक वृद्धि गर्ने विषयलाई आफ्नो प्राथमिकतामा राखेका छन् । पदभार ग्रहण गरेलगत्तै मन्त्रालयले मन्त्रीसमक्ष प्रस्तुत गरेको ‘तत्काल सुधार गर्नुपर्ने एजेण्डा’ मा यो विषय समावेश गरिएको हो ।

मन्त्रालयले तयार पारेको तत्काल सुधार गर्नुपर्ने एजेण्डाको ६ नम्बर बुँदामा इसिडी शिक्षक तथा विद्यालय कर्मचारीको तलब १९ हजार ५ सय रुपैयाँ कायम गर्न आवश्यक बजेट व्यवस्था गर्नुपर्ने उल्लेख गरिएको छ ।

मन्त्रालयका अनुसार हाल देशभर ३० हजार ५ सय ३१ जना इसिडी शिक्षक र ३३ हजार ४५ जना विद्यालय कर्मचारी कार्यरत छन् । उनीहरूको पारिश्रमिक वृद्धि सम्बन्धी विषय लामो समयदेखि उठ्दै आएको मागमध्ये एक हो ।

मन्त्री पोखरेलले मन्त्रालयले अघि सारेका सबै एजेण्डा आफ्नो प्राथमिकतामा रहेको बताएका छन् । उनले सम्बन्धित सरोकारवालासँग छलफल गरेर आवश्यक निर्णय गर्दै अघि बढ्ने बताए ।