रिलायन्स पब्लिक स्कुलद्वारा एसइई उत्तीर्ण विद्यार्थीलाई विदाइ तथा सम्मान

काठमाडौं । रिलायन्स एजुकेशन नेटवर्कअन्तर्गतको रिलायन्स पब्लिक स्कुलले २०८२ सालको माध्यमिक शिक्षा परीक्षा (एसइई) उत्तीर्ण विद्यार्थीलाई सम्मान तथा विदाइ गरेको छ । चाबहिलस्थित स्मार्ट प्यालेसमा आयोजित ‘एसइई ग्राजुएट्स फेलिसिटेसन एन्ड फेयरवेल प्रोग्राम–२०८३’ मार्फत विद्यार्थीहरुलाई शुभकामना, सम्मान तथा विदाइ गरिएको हो ।

कार्यक्रममा एसइईमा ४ जीपीए हासिल गर्ने तीन विद्यार्थी भावना बस्नेत, भाषिका शर्मा र अग्रीम गुरागाईंलाई जनही १० हजार रुपैयाँ नगदसहित विशेष सम्मान गरिएको थियो । अन्य उत्तीर्ण विद्यार्थीहरुलाई टिकासहित ग्राजुएसन ह्याट, मायाको चिनो तथा सम्मानपत्र प्रदान गरिएको विद्यालयले जनाएको छ ।

विद्यालयका प्रिन्सिपल बसन्तलाल लामिछानेले स्वागत मन्तव्य व्यक्त गर्दै विद्यालयको उत्कृष्ट नतिजा विद्यार्थी, अभिभावक, शिक्षक तथा व्यवस्थापनबीचको संयुक्त प्रयासको प्रतिफल भएको बताए । उनले रिलायन्सले केवल शैक्षिक उपलब्धिमात्र नभई संस्कारसहितको शिक्षालाई पनि प्राथमिकता दिँदै आएको उल्लेख गरे ।

कार्यक्रमका प्रमुख अतिथि वरिष्ठ पत्रकार, लेखक तथा विश्लेषक पुरुषोत्तम दाहालले शिक्षाले मात्र पूर्ण परिचय स्थापित नहुने भन्दै विद्यार्थीहरुले आफ्नो अन्तरनिहित प्रतिभा र क्षमता पहिचान गरी त्यसलाई उजागर गर्नुपर्नेमा जोड दिए । उनले रिलायन्स एजुकेशन नेटवर्कअन्तर्गतका विद्यालयहरुले हरेक वर्ष गुणस्तरीय र संस्कारयुक्त शिक्षा प्रदान गर्दै उत्कृष्ट नतिजा हासिल गरिरहेको उल्लेख गरे ।

नेटवर्कका बोर्ड अफ डाइरेक्टर तथा विशेष अतिथि राजुकुमार शिवाकोटीले रिलायन्समा अध्ययन गर्ने विद्यार्थीहरु शैक्षिक, सामाजिक तथा अतिरिक्त क्रियाकलापलगायत विभिन्न क्षेत्रमा अब्बल रहेको बताए । रिलायन्सले अध्ययनसँगै विद्यार्थीको करियर विकासमा समेत विशेष ध्यान दिँदै आएको उनको भनाइ थियो ।

अभिभावकको तर्फबाट बोल्दै बासु गुरागाईंले विद्यालयप्रति आभार व्यक्त गर्दै विद्यार्थीको भविष्य निर्माणमा रिलायन्सले खेलेको भूमिकाको प्रशंसा गरे ।

कार्यक्रमका सभापति तथा रिलायन्स एजुकेशन नेटवर्कका कार्यकारी अध्यक्ष रविन्द्रजंग थापाले नेटवर्कअन्तर्गतका विद्यालयहरुले वर्षौंदेखि दक्ष तथा सक्षम जनशक्ति उत्पादन गर्दै आएको बताए । रिलायन्सबाट अध्ययन गरेका विद्यार्थीहरु नेपाल तथा विदेशमा समेत सफलतापूर्वक अघि बढिरहेको उल्लेख गर्दै उनले आगामी दिनमा अझ उत्कृष्ट शैक्षिक वातावरण निर्माण गर्ने प्रतिबद्धता व्यक्त गरे ।

कार्यक्रममा ध्यान, राष्ट्रिय गान, सांगीतिक प्रस्तुति, अनुभव आदान–प्रदान, शुभकामना मन्तव्य, शिक्षक सम्मान तथा फेयरवेल गीतलगायत विविध कार्यक्रम प्रस्तुत गरिएको थियो ।

विद्यालयका अनुसार गत वर्ष एसइई परीक्षामा सहभागी ५५ जना विद्यार्थीतमध्ये तीन जनाले ४ जीपीए प्राप्त गरेका थिए भने अन्य विद्यार्थीहरुले पनि उत्कृष्ट नतिजासहित परीक्षा उत्तीर्ण गरेका छन् ।