थेसिस बुझाउन बाँकी रहेका विद्यार्थीलाई त्रिविले दियो मौका, क–कसले पाउँछन् ?

काठमाडौं । त्रिभुवन विश्वविद्यालय प्राज्ञिक परिषद्को कार्यालयले थेसिस बुझाउन बाँकी रहेका विद्यार्थीलाई फेरि एकपटक मौका दिएको छ । त्रिविमा स्नातकोत्तर तह र एम.फिल तहको सैद्धान्तिक परीक्षा पास गरिसकेको तर थेसिस, टर्मपेपर, प्रोजेक्ट रिपोर्ट इन्टर्नसीप, प्रयोगात्मक परीक्षा तथा शिक्षण अभ्यास पूरा नगरेकाहरुलाई त्रिविले मौका दिएको हो ।

यी विद्यार्थीको हकमा २०५८ सालमा प्रथम पटक भर्ना भई २०५९ सालमा प्रथम वर्षको परीक्षामा सम्मिलित भएका र सो पछि भर्ना भइ सीमा काटेकाहरुले यो मौकाको सदुपयोग गर्न सक्नेछन् । त्यसैगरी, सेमेष्टर प्रणाली अन्तर्गत २०६८ सालमा भर्ना भइ समयसीमा कटेका परीक्षार्थीहरुका लागि २०८१ असार मसान्तभित्र बुझाएर भाइवासमेत गरिसक्नुपर्ने त्रिविले जनाएको छ ।

साथै, एमफील तहका परीक्षार्थीका हकमा २०६८ सालमा भर्ना भई समयसीमा काटेकाहरुका लागि पनि एकपटकलाई मौका दिएको त्रिविको सूचनामा उल्लेख छ ।