एक महिनाभित्र एसईई नतिजा ल्याउने कार्यविधि बोर्डबाट पास, बुधबार मन्त्रालयले प्रमाणीकरण गर्ने

काठमाडौं । राष्ट्रिय परीक्षा बोर्ड ले एक महिनाभित्र माध्यमिक शिक्षा परीक्षा (एसईई)को नतिजा सार्वजनिक गर्ने व्यवस्था सहितको कार्यविधि पारित गरेको छ।

मंगलबार साँझ बसेको बोर्ड बैठकले उक्त कार्यविधि पारित गरी प्रमाणीकरणका लागि शिक्षा, विज्ञान तथा प्रविधि मन्त्रालयमा पठाएको हो। मन्त्रालयले बुधबार नै कार्यविधि प्रमाणीकरण गरी कार्यान्वयनमा ल्याउने तयारी गरेको स्रोतले जनाएको छ।

यसअघि प्रधानमन्त्री बालेन्द्र शाह (बालेन)ले एसईई नतिजा १५ दिनभित्र सार्वजनिक गर्ने गरी कार्यविधि बनाउन निर्देशन दिएका थिए। तर सो समयावधि व्यवहारिक रूपमा कठिन हुने निष्कर्षपछि बोर्डले एक महिनाभित्र नतिजा सार्वजनिक गर्ने व्यवस्था गर्दै कार्यविधि पारित गरेको हो।

शिक्षा, विज्ञान तथा प्रविधि मन्त्रालयले पनि बोर्डलाई एक महिनाभित्र नतिजा सार्वजनिक गर्नेगरी कार्यविधि तयार गर्न निर्देशन दिएको थियो ।

राष्ट्रिय परीक्षा बोर्ड परीक्षा नियन्त्रण कार्यालय (कक्षा १०)का परीक्षा नियन्त्रक टुकराज अधिकारीका अनुसार कार्यविधिमा उत्तरपुस्तिका परीक्षणको व्यवस्थासमेत समेटिएको छ ।

उनका अनुसार सम्भव भएका स्थानमा परीक्षा केन्द्रमै उत्तरपुस्तिका परीक्षण गर्ने व्यवस्था राखिएको छ। तर कतिपय दुर्गम क्षेत्रमा विषय शिक्षकको अभाव वा अन्य प्राविधिक चुनौती हुन सक्ने भएकाले त्यस्ता स्थानमा सम्बन्धित जिल्लाको शिक्षा विकास तथा समन्वय इकाइले व्यवस्थापन गरेर उत्तरपुस्तिका परीक्षण गर्ने व्यवस्था गरिएको छ ।

‘कतिपय दुर्गम क्षेत्रमा विषय शिक्षक नपाइने सम्भावना रहन्छ वा अन्य चुनौतीहरू आउन सक्छन्,’ अधिकारीले भने, ‘त्यस्तो अवस्थामा सम्बन्धित इकाइले व्यवस्थापन गरेर परीक्षण गर्नेछ। तर नतिजा भने एक महिनाभित्रै सार्वजनिक गर्नुपर्नेछ ।’

यसैबीच सम्बन्धित जिल्लाका शिक्षा विकास तथा समन्वय इकाइ, प्रदेश शिक्षा निर्देशनालय, राष्ट्रिय परीक्षा बोर्ड तथा परीक्षा केन्द्रबीचको समन्वय र सहयोगमा परीक्षा सञ्चालन गर्ने विषयमा पनि बैठकमा छलफल भएको उनले जानकारी दिए ।

यस वर्षको एसईई परीक्षा आगामी चैत्र १९ गतेबाट सुरु हुने तालिका रहेको छ ।