त्रिविअन्तर्गत बीआईटी कार्यक्रमको प्रवेश परीक्षा तालिका सार्वजनिक, आवेदन खुला

त्रिभुवन विश्वविद्यालय, विज्ञान तथा प्रविधि अध्ययन संस्थान (आईओएसटी) ले चार वर्षे स्नातक तहको “Bachelor in Information Technology (BIT)” कार्यक्रमका लागि शैक्षिक सत्र २०८३ को प्रवेश परीक्षा तथा नयाँ भर्नासम्बन्धी कार्यक्रम सार्वजनिक गरेको छ । सेमेस्टर प्रणाली अन्तर्गत ग्रेडिङ प्रणालीअनुसार सञ्चालन हुने उक्त कार्यक्रममा अध्ययन गर्न इच्छुक विद्यार्थीहरूका लागि अनलाइन आवेदन खुला गरिएको हो ।

प्रकाशित सूचनाअनुसार प्रवेश परीक्षाको आवेदन फाराम अनलाइन माध्यमबाट असार ११ गते बिहीबार बिहान १० बजेदेखि उपलब्ध गराइनेछ । नियमित शुल्क तिरी आवेदन फाराम बुझाउने अन्तिम मिति साउन २२ गतेसम्म तोकिएको छ भने दोब्बर शुल्क तिरेर साउन २३ गतेदेखि २७ गतेसम्म आवेदन दिन सकिने व्यवस्था गरिएको छ ।

बीआईटी कार्यक्रमको प्रवेश परीक्षा साउन ३० गते शनिबार बिहान ८ बजे सञ्चालन हुनेछ । प्रवेश परीक्षाको केन्द्र भने पछि सार्वजनिक गरिने जनाइएको छ ।

त्रिभुवन विश्वविद्यालय अन्तर्गत सञ्चालित “Bachelor in Information Technology (BIT)” कार्यक्रम सूचना प्रविधि क्षेत्रका दक्ष जनशक्ति उत्पादन गर्ने उद्देश्यले सञ्चालन हुँदै आएको चार वर्षे स्नातक कार्यक्रम हो । यससम्बन्धी थप जानकारी तथा अनलाइन आवेदनका लागि आईओएसटीको आधिकारिक वेबसाइट iost.tu.edu.np मा हेर्न सकिने जनाइएको छ ।