ट्युसन सेन्टरको छाना भत्किँदा १४ बालबालिकाको मृत्यु

काठमाडौं । पाकिस्तानको पञ्जाब प्रान्तस्थित लाहोरमा रहेको एक निजी ट्युसन सेन्टरको छाना भत्किँदा १४ जना बालबालिकाको मृत्यु भएको छ । मंगलबार कक्षा सञ्चालन भइरहेका बेला अचानक छाना भत्किँदा विद्यार्थीहरू भग्नावशेषमा पुरिएका थिए । दुर्घटनामा एक शिक्षिकासहित आठ जना बालबालिका घाइते भएका छन् ।

घटना लगत्तै स्थानीय बासिन्दा, उद्धारकर्मी र सुरक्षाकर्मीले संयुक्त रूपमा उद्धार अभियान सञ्चालन गरेका थिए । उपकरण र खाली हातको सहायताले भग्नावशेष हटाउँदै उद्धार कार्य गरिएको थियो । घाइते सबैलाई तत्काल अस्पताल पुर्‍याइएको छ भने उनीहरूको उपचार भइरहेको जनाइएको छ ।

प्रारम्भिक अनुसन्धानअनुसार उक्त ट्युसन सेन्टर दर्ताबिनै सञ्चालन भइरहेको थियो । कक्षा सञ्चालन भइरहेको भवन जीर्ण अवस्थामा रहेको निजी आवासीय भवन भएको र दुर्घटना हुँदा छानामा टायल मर्मतको काम भइरहेको खुलेको छ । मर्मतका क्रममा कमजोर संरचनाले भार थेग्न नसक्दा छाना भत्किएको हुन सक्ने अधिकारीहरूको प्रारम्भिक अनुमान छ । मृत्यु हुने बालबालिकाको उमेर पाँचदेखि १६ वर्षबीच रहेको छ भने अधिकांश नौ वर्षभन्दा कम उमेरका थिए ।

घटनापछि प्रहरीले भवनधनीसहित दुई जनालाई नियन्त्रणमा लिई अनुसन्धान सुरु गरेको छ । घटनास्थलबाट प्रमाण संकलन भइरहेको प्रहरीले जनाएको छ । प्रारम्भिक अनुसन्धानमा लापरवाही देखिए कानुनबमोजिम कडा कारबाही गरिने पञ्जाब प्रान्त सरकारले जनाएको छ ।

लाहोरकी आयुक्त मरियम खानले घटनाको निष्पक्ष, पारदर्शी र शीघ्र अनुसन्धान गरिने बताएकी छन् । पाकिस्तानका प्रधानमन्त्री शहबाज शरीफले घटनाप्रति गहिरो दुःख व्यक्त गर्दै घाइतेहरूको उपचारमा कुनै कमी हुन नदिन सम्बन्धित निकायलाई निर्देशन दिएका छन् । साथै भविष्यमा यस्ता दुर्घटना दोहोरिन नदिन भवन सुरक्षासम्बन्धी मापदण्ड कडाइका साथ कार्यान्वयन गर्न पनि निर्देशन दिइएको छ ।

पाकिस्तानमा कमजोर निर्माण मापदण्ड, गुणस्तरहीन निर्माण सामग्रीको प्रयोग तथा सुरक्षा मापदण्डको प्रभावकारी कार्यान्वयन नहुँदा भवन भत्किने घटना पटक–पटक हुने गरेका छन् । गत वर्ष पनि कराँचीमा पाँचतले भवन भत्किँदा २७ जनाको ज्यान गएको थियो । लाहोरको पछिल्लो घटनाले निजी ट्युसन सेन्टर तथा शैक्षिक संस्थाको भवन सुरक्षाप्रति फेरि गम्भीर प्रश्न उठाएको छ ।