भारतका चार विश्वविद्यालयबाट लिइएको समकक्षता त्रिभुवन विश्वविद्यालयद्वारा रद्द

काठमाडौं। त्रिभुवन विश्वविद्यालय (त्रिवि) पाठ्यक्रम विकास केन्द्रले भारतका चार विश्वविद्यालयबाट प्राप्त शैक्षिक उपाधिका आधारमा यसअघि प्रदान गरिएको समकक्षता (Equivalence) रद्द गरेको छ। केन्द्रले बुधबार सार्वजनिक सूचना जारी गर्दै सम्बन्धित व्यक्तिहरूको नाममा जारी भएका समकक्षता प्रमाणपत्रहरू खारेज गरिएको जनाएको हो ।

पाठ्यक्रम विकास केन्द्रका अनुसार भारतको CMJ University (Jorabat), Techno Global University (Shillong), Sangai International University (Manipur) तथा Pragyan International University (Jharkhand) बाट प्राप्त शैक्षिक उपाधिको समकक्षता रद्द गरिएको हो। यसअघि गठित छानबिन समितिको प्रतिवेदनका आधारमा ३५ दिने सार्वजनिक सूचना प्रकाशित गरी सम्बन्धित व्यक्तिहरूलाई आवश्यक प्रमाणसहित उपस्थित हुन आग्रह गरिएको थियो ।

केन्द्रले तोकिएको अवधिभित्र प्राप्त कागजात र प्रमाणहरूको अध्ययन गर्दा समकक्षता कायम राख्न पर्याप्त आधार नदेखिएकाले त्रिभुवन विश्वविद्यालय उपाधि मान्यता तथा समकक्षता सम्बन्धी विनियम, २०८२ को विनियम २१ बमोजिम समकक्षता प्रमाणपत्र रद्द गर्ने निर्णय गरिएको जनाएको छ ।

त्रिविले यस विषयसँग सम्बन्धित विस्तृत विवरण र समकक्षता रद्द गरिएका व्यक्तिहरूको नामावली पाठ्यक्रम विकास केन्द्रको आधिकारिक सूचनामार्फत सार्वजनिक गरेको छ ।