साथी शिक्षक कार्यक्रमको आठौँ समूह (कोहोर्ट)का लागि आवेदन खुला

काठमाडौँ । हेलम्बु एजुकेसन एन्ड लाइभलिहुड पार्टनरसिप (HELP) द्वारा सञ्चालित ‘साथी शिक्षक कार्यक्रम’ को आठौँ समूह (कोहोर्ट) का लागि आवेदन खुला गरिएको छ। सामुदायिक विद्यालयका विद्यार्थीको आधारभूत सिकाइ सीप सुधार गर्ने उद्देश्यले सञ्चालित यस कार्यक्रममा शिक्षा क्षेत्रमा रुचि राख्ने युवाले आवेदन दिन सक्नेछन्।

विगत सात वर्षदेखि सञ्चालन हुँदै आएको यस कार्यक्रमले आधारभूत तहका विद्यार्थीको पठन, लेखन तथा गणितीय सीप विकासमा जोड दिँदै आएको छ। हाल यो कार्यक्रम सिन्धुपाल्चोक र तनहुँ जिल्लाका तीन स्थानीय तहमा सञ्चालन भइरहेको छ।

कार्यक्रमअन्तर्गत साथी शिक्षकहरूले विभिन्न शिक्षण विधिको प्रयोग गरी विद्यार्थीलाई सिकाइ प्रक्रियामा सक्रिय रूपमा सहभागी गराउँछन्। आधारभूत साक्षरता तथा संख्यात्मक सीप विकाससँगै विद्यार्थीमा आलोचनात्मक सोच, सञ्चार, सहकार्य र सिर्जनशीलता अभिवृद्धि गर्न पनि कार्यक्रमले प्राथमिकता दिएको छ। यी चार क्षमतालाई ‘फोर सी स्किल्स’ (4C Skills) भनिन्छ, जुन एक्काइसौँ शताब्दीका महत्त्वपूर्ण सीपका रूपमा लिइन्छन्।

साथी शिक्षक कार्यक्रम सातौँ समूहसम्म आइपुग्दा ५३ जना पूर्वसाथी शिक्षक यससँग जोडिएका छन्। हाल २९ जना साथी शिक्षक कार्यरत छन्। कार्यक्रममार्फत हालसम्म दुई हजारभन्दा बढी विद्यार्थीलाई प्रत्यक्ष रूपमा सहयोग पुगेको जनाइएको छ।

शिक्षा क्षेत्रमा काम गर्न, आफ्नो क्षमता विकास गर्न तथा सामुदायिक विद्यालयको शैक्षिक गुणस्तर सुधारमा योगदान दिन इच्छुक युवाका लागि यो कार्यक्रम अवसरका रूपमा रहनेछ। आवेदन फाराम भर्न यहाँ क्लिक गर्नुहोस्। कार्यक्रमसम्बन्धी थप जानकारी साथी शिक्षक कार्यक्रमको आधिकारिक वेबसाइटमा उपलब्ध छ।

कार्यक्रमको उद्देश्य, कार्यप्रक्रिया तथा आवेदनसम्बन्धी थप जानकारी आधिकारिक वेबसाइटबाट प्राप्त गर्न सकिनेछ।

साथी शिक्षक कार्यक्रम स्थानीय सरकारसँगको सहकार्यमा सञ्चालन हुँदै आएको छ। यस कार्यक्रममार्फत आफ्नो स्थानीय तहका सामुदायिक विद्यालयको शैक्षिक गुणस्तर सुधार गर्न इच्छुक स्थानीय सरकारले पनि सहकार्यका लागि आफ्नो रुचि व्यक्त गर्न सक्नेछन्। स्थानीय तहले कार्यक्रमसँग सहकार्य गर्न आफ्नो रुचि यस फाराममार्फत व्यक्त गर्न सक्ने व्यवस्था गरिएको छ ।