महानगरले अब कक्षा १० सम्मकै विद्यार्थीलाई दिवा खाजा दिने

काठमाडौँ । काठमाडौँ महानगरपालिकाले विद्यार्थीलाई दिवा खाजाको व्यवस्था गर्ने भएको छ । महानगरले कक्षा ६ देखि १० सम्मका विद्यार्थीलाई दिवा खाजाको व्यवस्था गर्न लागेको हो ।

यसअघि महानगरले कक्षा ८ सम्म दिवा खाजा दिँदै अखाएकोमा अब कक्षा १० सम्मका विद्यार्थीलाई खाजा दिने व्यवस्था गरेको हो ।

सङ्घीय सरकारले कक्षा ६ सम्म प्रतिविद्यार्थी १५ रुपैयाँ दिँदै आइरहेकामा महानगरले गत वर्षदेखि १० रुपैयाँ थप गरेर २५ रुपैयाँ पुर्याएको थियो ।

सामुदायिक विद्यालयमा प्रारम्भिक बालविकासदेखि कक्षा ५ सम्म अध्ययनरत विद्यार्थीका लागि सरकारले दिँदै आएको रू १५ मा महानगरले रू १५ थप गरी रू ३० पु¥याएको महानगरको शिक्षा विभाग प्रमुख सिताराम कोइरालाले जानकारी दिए ।

यही भदौदेखि कक्षा ६ देखि कक्षा १० सम्मलाई पनि दिवा खाजाको व्यवस्थापन गर्न महानगरअन्तर्गत शिक्षा विभागले विद्यालयलाई पत्राचार गरेको छ ।कामपाभित्र ८९ वटा सामुदायिक विद्यालय सञ्चालनमा छन्। दिवा खाजा कार्यक्रमबाट प्रारम्भिक बालविकासदेखि कक्षा १० सम्मका गरेर करिब ४० हजार विद्यार्थी लाभान्वित हुने छन्। उनका अनुसार दिवा खाजाका लागि महानगरले २३ करोड रुपियाँ विनियोजन गरेको छ।