अब त्रिविको शैक्षिक प्रमाणपत्रहरु अनलाइनबाटै, यस्तो छ अनलाइनमार्फत आवेदन दिने तरिका

काठमाडौं । त्रिभुवन विश्वविद्यालय परीक्षा नियन्त्रण कार्यालय (त्रिवि पनिका) ले अब अनलाइनमार्फक शैक्षिक प्रमाणपत्र दिने तयारी गरेको छ । त्रिवि पनिकाले आगामी माघ १५ गतेदेखि अनलाइनमार्फत सेवा दिन लागेको हो ।

जसका लागि अनलाइनमार्फत आवेदन दिने तरिकासमेत कार्यालयले सार्वजनिक गरिसकेको छ ।

विभिन्न तहका शैक्षिक प्रमाणपत्र वितरणमा ढिलाई एवम् पारदर्शी नभएको भन्दै लामो समयदेखि त्रिविको आलोचना हुँदै आएको थियो । त्यसलाई सम्बोधन गर्ने उद्धेश्यले त्रिविले सूचना प्रविधिको प्रयोगमा जोड दिँदै शैक्षिक प्रमाणपत्रका लागि अनलाइनमार्फत आएको आवेदनका आधारमा वितरण गर्न लागेको परीक्षा नियन्त्रक पुष्पराज जोशी बताउँछन् ।

त्यसैले अब विद्यार्थीले ट्रान्सक्रिप्ट, प्रोभिजनल, पुनर्योग, प्रतिलिपि लगायतका शैक्षिक प्रमाणपत्रको लागि अनलाइन आवेदन दिन सक्नेछन् ।

प्रक्रिया पु¥याएर आवेदन दिएको विद्यार्थीको आवश्यक कागजात अपुग भए अथवा अरु समस्या आए इमेल अथवा फोन मार्फत विद्यार्थीलाई जानकारी दिइने र सो अनुसार फेरि आवेदन दिनुपर्ने पनिका बल्खुले जनाएको छ ।

आवेदन अनुसार विद्यार्थीको प्रमाणपत्र सम्बन्धित क्षेत्रीय परीक्षा नियन्त्रण कार्यालय मार्फत वितरण गरिने र प्रमाणपत्र संकलन गर्दा स्वयं विद्यार्थी अथवा विद्यार्थीले इच्छाइएको व्यक्ति हुनुपर्ने बल्खुले सूचनामा उल्लेख गरेको छ ।

नाम, थर आदि सच्चाउने प्रकृयाको लागि आवश्यक कागजातहरु बल्खु वा सम्बन्धित क्षेत्रीय परीक्षा नियन्त्रण कार्यालयमा बुझाउनुपर्नेछ ।

कसरी दिने अनलाइन आवेदन ? (तस्विरमा हेर्नुहोस्)