द ब्रिटिश कलेजमा आन्दोलनको नाममा ठूलो रकम मागेको आरोपमा विवेक ढकाल पक्राउ

काठमाडौं—द ब्रिटिश कलेजमा आन्दोलनको नाममा ठूलो रकम मागेको आरोपमा विवेक ढकाल पक्राउ परेका छन् । काठमाडौं प्रहरी परिसरका एसपी तथा सूचना अधिकारी पवन भट्टराईकाअनुसार आपराधिक लाभ लिन नहुने कसुरमा उजुरी दर्ता भएपछि प्रहरीले शनिबार ढकाललाई पक्राउ गरेको हो ।

ढकालले कलेजको व्यवस्थापनसँग ३० लाख रुपैयाँ मागेको र नदिए कलेज नै बन्द गराइदिने धम्की दिएका अडियो प्रहरी कहाँ पुगेको थियो । काभ्रेपलाञ्चोक जिल्ला चौंरीदेउराली गाउँपालिका— ४ स्थायी घर भई हाल जोरपाटी २८ वर्षीय ढकाल कलेज बन्द गर्न राजनीतिक र प्रशासनिक पहुँच प्रयोग गर्ने धम्की दिदैं रकमको बार्गेनिङ गरेको अडियोमा सुनिन्छ ।

ढकाल मुलुकी अपराध सहिता, २०७४ को दफा २५३ बमोजिम अपराधिक लाभ सम्बन्धी कसूरमा पक्राउ गरेर हिरासतमा राखेर अनुसन्धान गरिरहेको भट्टराईले जानकारी दिए ।

ढकालले २०८२ साल पुस १६ र १७ गते नक्सालस्थित एक होटलमा कलेजको व्यवस्थापकसँग भएका भेटघाटका क्रममा डर, त्रास र दबाब सिर्जना गर्दै रकम नदिए गम्भीर परिणाम भोग्नुपर्ने चेतावनी दिएका थिए । ढकालविरुद्ध सामाजिक सञ्जाल तथा सीमित अनलाइन समाचार पोर्टलमार्फत कलेजको प्रतिष्ठा, विश्वसनीयता र छविमा नकारात्मक प्रभाव पार्ने सामग्रीहरू फैलाएको आरोप पनि लगाइएको छ ।

त्यस्तै, गत पुस ८ गते ब्रिटिश कलेज रहेको भवन ट्रेड टावर परिसरमा नारा जुलुस, तोडफोड तथा सवारी साधनमा क्षति पुर्‍याउने गतिविधिमा ढकाल पनि संलग्न भएको आरोप लगाइएको छ ।

ढकाल किल युनिभर्सिटीको सम्बन्धनमा सञ्चालन भइरहेको ब्रिटिश इन्टरनेशनल कलेजका पूर्व विद्यार्थी समेत हुन् । उनले कलेजलाई तिर्नुपर्ने शुल्क समेत भुक्तानी नगरेको कलेज प्रशासनको दावी छ।

पीडित पक्षले दिएको जाहेरीमा धम्कीपूर्ण ह्वाट्सएप म्यासेज, अडियो रेकर्डिङ, समाचार सामग्रीका लिङ्क तथा अन्य कागजातहरू प्रमाणका रूपमा प्रहरीसमक्ष पेश गरिएको थियो । सोही आधारमा ढकाल पक्राउ परेका हुन् ।