बोर्डका ४ जना सहसचिवको पदस्थापन, प्रशासन प्रमुखमा सत्याल, परीक्षा नियन्त्रकमा शर्मा

काठमाडौं- राष्ट्रिय परीक्षा बोर्डले चार जना सहसचिवको पदस्थापन गरेको छ । गत पुष १४ गते सहसचिवमा बढुवा भएका जयन्ती सत्याल, कृष्णप्रसाद शर्मा, रमाकान्त तिवारी र भाष्करदत्त पन्तलाई पदस्थापन गरेको हो ।

बोर्डले यसअघि बागमती प्रदेशको प्रदेश परीक्षा व्यवस्थापन कार्यालयको प्रमुख रहेकी सत्याललाई बोर्डको प्रशासन प्रमुखको जिम्मेवारी दिएको छ । त्यस्तै, यसअघि पनि परीक्षा नियन्त्रकको जिम्मेवारीमा रहेका कृष्ण शर्मालाई पुनः नियन्त्रककै भूमिका दिइएको छ । उनी विगत ६ वर्षदेखि परीक्षा नियन्त्रकै जिम्मेवारीमा छन् ।

अर्का सहसचिव रमाकान्त तिवारीलाई बागमती प्रदेशको प्रदेश परीक्षा व्यवस्थापन कार्यालयको प्रमुखको जिम्मेवारी दिएको छ भने भाष्करदत्त पन्तलाई योजना तथा अनुगमन महाशाखा प्रमुखको जिम्मेवारी दिइएको बोर्डले जनाएको छ । यसैगरी, अनुसन्धान तथा शासकीय सुधार महाशाखाको निमित्त प्रमुखको रुपमा उपसचिव बेदनाथ अधिकारीलाई जिम्मेवारी दिइएको छ ।