रिलायन्स पब्लिक स्कुलद्वारा एसईई उत्तीर्ण विद्यार्थीलाई सम्मान

काठमाडौं । कपन विवेकचोकस्थित रिलायन्स पब्लिक स्कुलले २०८१ सालमा एसईई उत्तीर्ण विद्यार्थीहरुलाई सम्मान गरेको छ । स्कुलले मंगलबार एक भव्य समारोहकाबीच एसईई उत्तीर्ण ११ औँ ब्याचका विद्यार्थी र अभिभावकहरुलाई सम्मान गरेको हो ।

रिलायन्सबाट गत वर्ष ५२ जना विद्यार्थी परीक्षामा सहभागी भएका थिए । जसमध्ये २ जना विद्यार्थीले ४ जीपीए प्राप्त गरेका थिए । भने, अन्य विद्यार्थीले पनि उत्कृष्ट जीपीएका साथ एसईई उत्तीर्ण गरेको विद्यालयले जनाएको छ ।

विद्यार्थी सम्मान कार्यक्रममा काठमाडौं विश्वविद्यालय स्कुल अफ एजुकेशनका एसोसिएट डीन हेमराज काफ्ले प्रमुख अतिथिका रुपमा उपस्थित थिए । उनले विद्यार्थीहरुलाई शिक्षामात्र होइन सकारात्मक सोचको निर्माण, अनुशासन र सम्भावनाको खोजी गर्न सिकाउनुपर्ने बताए । ‘आजका विद्यार्थीलाई किताबी ज्ञानलेमात्र पुग्दैन उनीहरुमा भविष्यबारे सोच्ने, अनुशासित बनाउने र सम्भावना खोज्ने शिक्षाको खाँचो छ,’ उनले भने, ‘पक्कै पनि त्यो शिक्षा रिलायन्सले दिएको छ भन्नेमा म ढुक्क छु ।’

बुढानिलकण्ठ नगरपालिकाका नगर प्रवक्ता एवम् वडा नम्बर १० का वडाध्यक्ष नवराज भट्टराईले रिलायन्सले उत्कृष्ट नतिजा हासिल गरेकोमा बधाई तथा शुभकामना दिए । ‘रिलायन्सले बुढानिलकण्ठमा आफ्नो बेग्लै शैक्षिक पहिचान बनाएको छ जो हाम्रा लागि गौरवको विषय हो,’ कार्यक्रमको विशेष अतिथिसमेत रहेका भट्टराईले भने, ‘आफ्नो नेटवर्कभित्रका सबै विद्यालयमा रिलायन्सले प्राप्त गरेको नतिजा अनुकरणीय र प्रशंसनीय छ ।’

कार्यक्रममा रिलायन्स एजुकेशन नेटवर्ककका अध्यक्ष रवीन्द्रजंग थापाको अध्यक्षता रहेको थियो । उनले कार्यक्रममा उपस्थित विद्यार्थीे तथा अभिभावकहरुलाई बधाई दिँदै अबका शैक्षिक गन्तव्य पनि सही रुपमा छनोट गर्न सुझाव दिए । साथै, रिलायन्सका सबै नेटवर्कले आफ्नो रुटिनमा रहेर काम गरेकाले यस्तो नतिजा आएको उनको भनाइ थियो ।

कार्यक्रममा स्कुलका प्रिन्सिपल बसन्तलाल लामिछानेले स्वागत मन्तव्यमार्फत कार्यक्रममा उपस्थित सबैलाई स्वागत गरेका थिए । कार्यक्रममा बोल्दै उनले विद्यार्थी, अभिभावक, शिक्षक र व्यवस्थापनको संयुक्त प्रयासबाट रिलायन्स पब्लिकले राम्रो नतिजा ल्याउन सम्भव भएको बताए ।

त्यस्तै, एसईई उत्तीर्ण जेनिशा ढकालले विद्यार्थीहरुको तर्फबाट धन्यवाद मन्तव्य दिएकी थिइन् । ढकालले एसईईमा ४ जीपीए प्राप्त गरेकी थिइन् ।

यसैगरी, अभिभावकको तर्फबाट भूमीदत्त पौडेलले विद्यालयलाई धन्यवाद दिएका थिए । ‘मैले जुन विश्वास र भरोसा गरेर मेरो छोरोलाई रिलायन्समा भर्ना गरेको थिएँ आज त्यो रिलायन्सले त्यो विश्वासलाई कायम गरेको छ,’ उनले भने ।

कार्यक्रममा रिलायन्स नेटवर्ककका निर्देशक एवम् चार्टर अकाउन्टेन्ट राजुकुमार सिवाकोटीले एसईई उत्तीर्ण विद्यार्थीलाई बधाई तथा शुभकामना दिँदै आगामी शैक्षिक सफलताको शुभकामना समेत व्यक्त गरे । साथै, एसईई उत्तीर्ण विद्यार्थीहरुको उमेर संक्रमणकालिन अवस्थामा रहेकाले सजग हुन आग्रह गरे । ‘कक्षा १० सम्म हामीले किताब पढ्यौँ अब कक्षा ११ पछि चाहिँ जीवन पढ्ने हो बुझ्ने हो त्यसैले संयमित भएर आफ्नो जीवनलाई अघि बढाउनुहोला,’ सिवाकोटीले भने ।

कार्यक्रममा विद्यार्थीहरुले विभिन्न साँस्कृतिक प्रस्तुतिसमेत प्रस्तुत गरेका थिए ।