कक्षा १२ मौका परीक्षाको समयतालिका सार्वजनिक, ११ बजेदेखि परीक्षा

काठमाडौं । राष्ट्रिय परीक्षा बोर्डले कक्षा १२ मौका परीक्षाको समयतालिका सार्वजनिक गरेको छ । बोर्डले आगामी भदौ २५ र २६ गते हुने मौका परीक्षाको तालिका सार्वजनिक गरेको हो ।

बोर्डले सार्वजनिक गरेको तालिकामा २५ गते अनिवार्य अग्रेजी, एक विषयमा मात्र परीक्षा दिने परीक्षार्थीहरुको सबै विषयको परीक्षा दिन पाउनेछन् । दुई विषयमा परीक्षा दिने परीक्षार्थीहरुका लागि आफूले परीक्षा दिने विषयहरु मध्येको सानो कोड नम्बर भएको विषय तर अनिवार्य अंग्रेजी र अनिवार्य नेपाली दुवै विषयमा मौका परीक्षामा सहभागी हुने परीक्षार्थीले पहिलो दिन अनिवार्य अंग्रेजी (००४१) र दोस्रो दिन अनिवार्य नेपाली (००२१) विषयको परीक्षा दिनुपर्ने बोर्डले जनाएको छ ।

त्यस्तै, भदौ २६ गते दुई विषयमा परीक्षा दिने परीक्षार्थीहरुको लागि आफूले परीक्षा दिने विषयहरु मध्येको ठूलो कोड नम्बर भएको विषयको परीक्षा दिनेछन् । यद्यपि, यस दिन अनिवार्य अंग्रेजी (००४१) विषयको परीक्षा सञ्चालन नहुने बोर्डले जनाएको छ । परीक्षा बिहान ११ बजेदेखि २ बजेसम्म सञ्चालन हुने बोर्डद्वारा जारी सूचनामा उल्लेख छ ।

भदौ १९ गतेभित्र आवेदन फारम बुझाई सक्नुपर्ने

मौका परीक्षा सहभागि हुनका लागि बोर्डले भदौ १९ (बुधबार)सम्म आवेदन फारम बुझाई सक्न सूचना जारी गरेको छ । बोर्डले सार्वजनिक सूचना जारी गर्दै प्रति विषय ६०० शुल्क र बिलम्ब शुल्क १२०० बुझाई सोको भौचर बोर्डका सम्बन्धित कार्यालयमा बुझाउन अनुरोध समेत गरेको छ ।