काठमाडौं महानगरद्वारा छात्रवृत्ति परीक्षाको नतिजा सार्वजनिक (नतिजासहित)

काठमाडौं– काठमाडौं महानगरपालिकाले कक्षा ११ मा अध्ययन गर्न चाहने विद्यार्थीहरुका लागि लिएको छात्रवृत्ति परीक्षाको नतिजा सार्वजनिक गरेको छ । गत साउन ४ गते लिइएको परीक्षाको नतिजा महानगरले सोमबार सार्वजनिक गरेको हो ।

गत वर्षबाट महानगरले परीक्षामार्फत विद्यार्थीलाई कक्षा ११ मा छात्रवृत्ति दिन थालेको थियो । त्यसैलाई यसपाली पनि निरन्तरता दिइएको महानगर प्रमुख बालेन साह बताउँछन् ।

महानगरले नतिजा प्रकाशनका क्रममा विभिन्न मापदण्डसमेत बनाएको छ । परीक्षामा उच्च्तम अंक ल्याउनेलाई सबैभन्दा पहिलो योग्यताक्रमअनुसार र बराबर अंक ल्याउनेलाई एसईईको जीपीएको आधारमा छात्रवृत्ति उपलब्ध गराइएको महानगर प्रमुख साहले जानकारी दिए । यसैगरी, विषयगत रुपमा गणित, विज्ञान, अंग्रेजी र सामान्य ज्ञानमा प्राप्त गरेको अंक र सो पनि बराबर भएमा उमेरका आधारमा कनिष्टलाई योग्यताक्रममा अघि राख्ने निर्णय गरिएको उनले बताए ।

प्रकाशित भएको छात्रवृत्ति नतिजा अनुसार कायम योग्यता सूचीमा नाम समावेश नभएको वा नाम समावेश भएको तर योग्यता सूची उपर चित्त नबुझेका परीक्षार्थीले अनुसूची ३ बमोजिमको फाराम भरी महानगरपालिकामा पुनर्योग वा दाबीविरोधका लागि आवश्यक प्रमाणसहित अनलाइन मार्फत निवेदन दिन सक्ने साहले बताए । ‘आजको मितिबाट पुनर्योग एवं दाबीविरोधका लागि ३ दिन, अर्थात् २०८१ साल साउन १० गते बिहिवारसम्म तोकिएको छ,’ उनले सामाजिक सञ्जालमार्फत भनेका छन् ।
छात्रवृत्ति वितरण परीक्षा र परीक्षार्थीहरूले अनलाइनमार्फत छानेका शिक्षण संस्थाहरूका योग्यता एवं प्राथमिकताका आधारमा भर्ना हुनका लागि परीक्षार्थीलाई २०८१ साल साउन १३ गते शिक्षण संस्थाहरू सिफारिस गरिनेसमेत उनले बताए ।

‘योग्यता एवं प्राथमिकताका आधारमा छात्रवृत्ति प्राप्त गर्न प्रतिक्षामा रहेका विद्यार्थीहरूलाई छात्रवृत्ति कोटा खाली रहेका विद्यालयहरूमा पुनः म्याचिङ गर्ने अवसर दिइनेछ,’ उनले भने, ‘यस्तो पुनः म्याचिङ गर्दा एउटा विषय समूहमा आवेदन दिएको परीक्षार्थीले अर्को विषय समुहमा पनि शिक्षण संस्था रोज्न पाउनेछ ।’

पुनः म्याचिङ गर्ने समय पछि प्रकाशन गरिने महानगरले जनाएको छ ।

हेर्नुहाेस् नतिजा