अब शिक्षकले मासिक रुपमा तलब पाउने, केन्द्रले सबै स्थानीय तहलाई दियो यस्तो निर्देशन !

काठमाडौं– शिक्षा तथा मानव स्रोत विकास केन्द्रले शिक्षकलाई मासिक रुपमा तलबभत्ता उपलब्ध गराउन सबै स्थानीय तहलाई अनुरोध गरेको छ । केन्द्रको बुधबार बसेको बैठकले चालु आर्थिक वर्ष २०८१/०२ को स्वीकृत कार्यक्रम कार्यान्वयन कार्यविधिको खण्ड २ को बुँदा ५ मा उल्लेख भएको प्राबधानलाई कार्यान्वयनमा लैजाने निर्णय गर्दै स्थानीय तहलाई अनुरोध गरेको केन्द्रकी शाखा अधिकृत मुक्तादेवी पोखरेलले जानकारी दिइन् ।

आ.व. २०८१/०८२ को स्वीकृत कार्यक्रम कार्यान्वयन कार्यविधिको खण्ड २ स्थानीय तहबाट सम्पादन हुने सशर्त अनुदानका सबै बजेट उपशिर्षकहरुको कार्यक्रम कार्यान्वयन प्रक्रिया एवम् मापदण्डको शिक्षकको तलबभत्ता अन्तर्गत बुँदा नम्बर ५ मा विद्यालयले शिक्षक र कर्मचारीको तलब भत्ता बैंकिङमार्फत भुक्तानी हुने व्यवस्था मिलाउनुपर्ने उल्लेख छ । त्यस्तै, उक्त बुँदामा विद्यालयले त्रैमासिकको पहिलो महिनामा तीन महिनाका लागि नियमानुसार आवश्यक तलब भत्ता स्थानीय तहमा माग गर्ने र सोका आधारमा स्थानीय तहले विद्यालयलाई निकासा दिई विद्यालयले शिक्षकलाई नियमानुसार मासिकरुपमा तलबभत्ता भुक्तानी हुने व्यवस्था मिलाउने उल्लेख छ ।

उक्त प्रावधानलाई प्रभावकारी कार्यान्वयन गर्न सबैलाई अनुरोध गरिएको पोखरेलले जानकारी दिइन् । त्यस्तै, यस कार्यमा आवश्यक समन्वय सहजीकरणका साथै सो कार्यको नियमित अनुगमन गरी केन्द्रमा प्रतिवेदन पेश गर्न सबै जिल्लाका शिक्षा विकास तथा समन्वय इकाइलाई केन्द्रले निर्देशनसमेत दिएको छ ।