कक्षा १२ को परीक्षा तोकिएकै मितिमा गर्ने बोर्डको निर्णय

काठमाडौं । राष्ट्रिय परीक्षा बोर्डले कक्षा १२ को परीक्षा तोकिएकै मितिमा गर्ने निर्णय गरेको छ । बोर्डको मंगलबार बिहान बसेको बैठकले कक्षा १२ को परीक्षा वैशाख ११ गतेबाटै सञ्चालन गर्ने निर्णय गरेको परीक्षा नियन्त्रक कृष्ण शर्माले जानकारी दिए ।

‘हामीले परीक्षाको सम्पूर्ण तयारी गरिसेकेका थियौँ सरकारले पनि परीक्षा गर्न दबाब दियो,’ उनले भने, ‘बोर्डको बैठकले पनि सोही अनुसार तोकिएकै मितिमा परीक्षा गर्ने निर्णय गरेको छ ।’

विगत तीन सातादेखि शिक्षा ऐनको माग गर्दै देशभरका शिक्षकहरु आन्दोलनमा रहेका बेला कक्षा १२ को परीक्षा गर्ने कि सार्ने भन्ने विषयमा अन्योल भएको थियो । तर, आज बिहान बसेको बोर्ड बैठकले सम्पूर्ण जिल्लाका परीक्षा समन्वय समिति मार्फत कक्षा १२ को परीक्षा केन्द्र भएका विद्यालयहरूलाई परीक्षा सञ्चालन गर्न अनुरोध गर्ने निर्णय गरेको छ ।

यही अन्योलताको बिचमा शिक्षा विज्ञान तथा प्रविधि मन्त्री विद्या भट्टराईले सोमबार राजीनामा दिएकी थिइन् ।