शिक्षामन्त्री पुनको निर्देशनः ३ महिनामै नतिजा, हरेक स्कुलमा कम्प्युटर शिक्षक, त्रिविकाे सफाइ

काठमाडौं । शिक्षा, विज्ञान तथा प्रविधि मन्त्री डा. महाविर पुनले आज मन्त्रालयमा तत्कालै कार्यान्वयन गर्नुपर्ने तीन कदम अघि सारेका छन्।

मन्त्री पुनका अनुसार नेपालभरका सामुदायिक माध्यमिक विद्यालयका विद्यार्थीलाई कम्प्युटर शिक्षाबाट वञ्चित हुन नदिन प्रत्येक विद्यालयमा अनिवार्यरूपमा एक जना कम्प्युटर शिक्षकको दरबन्दी थपिनेछ।

त्यस्तै, कतिपय विश्वविद्यालयले परीक्षा लिएर परीक्षाफल प्रकाशन गर्न आठ महिना देखि एक वर्षसम्म लगाउने गरेको भन्दै उनले अब बढीमा तीन महिनाभित्र नतिजा अनिवार्यरूपमा सार्वजनिक गर्न निर्देशन दिने घोषणा गरेका छन्। समयमा नतिजा ननिकाल्ने विश्वविद्यालयको अनुदान रोक्का गरिने पनि उनले चेतावनी दिएका छन्। “राष्ट्रिय परीक्षा बोर्डले १२ कक्षाको पाँच लाख विद्यार्थीको नतिजा तीन महिनामै निकाल्न सक्छ भने विश्वविद्यालयले पनि गर्न सक्नुपर्छ,” मन्त्री पुनले बताएका छन्।

तेस्रो निर्देशनका रूपमा उनले त्रिभुवन विश्वविद्यालय, कीर्तिपुर परिसरभित्रको ठूलो क्षेत्रफलकमा रहेका झाडी फाँडेर (ठूलो रुख नकटाई) सफा गर्ने, बगैँचा र फुटपाथ बनाएर वातावरण सुन्दर र आकर्षक बनाउनुपर्ने बताएका छन्।

यी तीन कदमबारे मन्त्री पुनले आफ्नाे सामाजिक सञ्जालमार्फत सार्वजनिक गरेका हुन्।