आफ्नै भवनमा सर्यो शिक्षा मन्त्रालय, मन्त्री पुनको बसोबास पनि सिंहदरबारमै

काठमाडौं । शिक्षा विज्ञान तथा प्रविधि मन्त्रालय पुन सिंहदरबारमा नै सरेको छ । गत भदौ २३ र २४ गतेको जेन जी आन्दोलनपछि केशरमहलबाट सेवा दिइरहेको मन्त्रालयलाई सिंहदरबारमै सारिएको हो ।

जेन जी प्रदर्शनकारीले सिंहदरबारमा रहेको शिक्षा मन्त्रालयको भवनमा आंशिक क्षति पुर्याएका थिए । जसलाई मर्मत गरी सोही स्थानबाट सेवा सुचारु गरिएको मन्त्रालयका योजना तथा अनुगमन महाशाखा प्रमुख एवम् प्रवक्ता शिवकुमार सापकोटाले जानकारी दिए । ‘हामीले आज दिउँसो ३ बजेदेखि नै शिक्षातर्फका महाशाखा/शाखाबाट प्रवाह हुने सेवा सिंहदरबार परिसरमा रहेको मन्त्रालयको भवनबाट सञ्चालन गरिसकेका छौँ,’ उनले भने ।

विज्ञानतर्फका महाशाखा/शाखाबाट प्रवाह हुने सेवा हालका लागि केशरमहल र सिंहदरबार दुवै स्थानबाट सञ्चालन हुने उनले जानकारी दिए । त्यस्तै, वैदेशिक अध्ययन अनुमतिपत्र शाखा (एनओसी), शैक्षिक परामर्श तथा प्रमाणीकरण शाखा र छात्रवृत्ति शाखाबाट प्रदान हुँदै आएको सेवा पूर्ववत स्थानबाटै निरन्तर सुचारु भइरहेको मन्त्रालयले जनाएको छ ।

मन्त्री पुनको बसोबास अब सिंहदरबारमै
मन्त्रालयलाई सारेसँगै मन्त्री महाविर पुनको बसोबास अब सिंहदरबारमै हुने सूचना अधिकारी मधुप्रसाद घिमिरेले जानकारी दिए । ‘हामीले मन्त्री ज्यूको लागि बसोबासको व्यवस्था मन्त्रालयमै मिलाएका छौँ,’ उनले भने, ‘अब उहाँ सिंहदरबारमै बस्नुहुन्छ ।’
५ असोजमा मन्त्रीमा नियुक्त भएसँगै पुन मन्त्रालयमै बस्दै आएका छन् ।