आजबाट एसईई परीक्षा सुरु

काठमाडौं — माध्यमिक शिक्षा परीक्षा (एसईई) आजदेखि देशभर सुरु भएको छ। बिहान ८ बजेदेखि परीक्षा सञ्चालन भएकाे हाे ।

बोर्डले यसअघि नै परीक्षा सञ्चालनका लागि आवश्यक सम्पूर्ण तयारी पूरा भएको जनाएको थियो। परीक्षा नियन्त्रक टुकराज अधिकारीका अनुसार प्रदेश र जिल्लासँग समन्वय गरी प्रश्नपत्र, उत्तरपुस्तिका तथा आवश्यक सामग्री सम्बन्धित केन्द्रमा पठाइसकिएको थियो। परीक्षा सञ्चालनका लागि केन्द्राध्यक्ष, कर्मचारी र सुरक्षाकर्मी पनि केन्द्रमा खटाइएको बोर्डले जनाएको छ ।

यसवर्ष एसईई सञ्चालनका लागि देशभर १ हजार ९६६ वटा परीक्षा केन्द्र तोकिएका छन्। तीमध्ये एउटा केन्द्र जापानमा पनि रहेको छ । बोर्डका अनुसार यस पटक ५ लाख १२ हजार ४ सय २१ जना विद्यार्थी परीक्षामा सहभागी छन् । परीक्षार्थीमध्ये २ लाख ५७ हजार ६ सय १३ छात्रा, २ लाख ५४ हजार ८ सय १ छात्र र ७ जना अन्य रहेका छन्। जापानस्थित एभरेस्ट स्कुलबाट २३ विद्यार्थीले परीक्षा दिइरहेका छन् ।

आजको पहिलो दिन अंग्रेजी विषयको परीक्षा बिहान ८–११ बजे सञ्चालन भइरहेको छ। बोर्डले परीक्षा निष्पक्ष र व्यवस्थित रूपमा सञ्चालन गर्न आवश्यक व्यवस्थापन गरिएको जनाएको छ  ।