व्यवसायी गोल्छा पक्राउ, पुल्चोक क्याम्पसको जग्गामा रहेको इम्बार्क कलेजको विवाद फेरि सतहमा

काठमाडौं— धितोपत्र बजारलाई प्रभावित गरेको कसुरमा इम्बार्क कलेजका अध्यक्ष तथा व्यवसायी शेखर गोल्छा पक्राउ परेका छन् । बिहीबार साँझ नेपाल प्रहरीको केन्द्रीय अनुसन्धान ब्यूरो (सिआईबी)ले इम्बार्क कलेजका अध्यक्षसमेत रहेका व्यवसायी गोल्छालाई नक्सालबाट पक्राउ गरेको सिआईबीका प्रवक्ता शिव श्रेष्ठले जानकारी दिए ।

धितोपत्रसम्बन्धी ऐन, २०६३ ले वर्जित गरेका धितोपत्र बजारमा झूटो कारोबार, मूल्यमा उतारचढाव र धितोपत्र बजारलाई प्रभावित पारेको कसुरमा गोल्छामाथि प्रहरीले अनुसन्धान अघि बढाएको छ । उनको विवादास्पद व्यवसायी दिपक भट्टसँग शंकास्पद सम्बन्धमाथि पनि प्रहरीले अनुसन्धान गरिरहेको छ ।

व्यवसायी गोल्छाले एक वर्षअघि पुल्चोक क्याम्पसको जग्गामा निजी कलेज खोलेपछि उक्त कलेज विवादमा परेको थियो । तर, तत्कालीन सरकार र सरकारी संयन्त्रले प्रभावकारी भूमिका खेल्न नसक्दा उक्त निजी कलेज अहिले पनि सरकारी क्याम्पसकै जग्गामा चलिरहेको छ । गोल्छा समूह र ग्लोकल प्रा.लि.को सहकार्यमा एक वर्षअघि इन्जिनियरिङ अध्ययन संस्थान (आईओई)को पुल्चोक क्याम्पसकै जग्गामा इम्बार्क कलेज खोल्ने गरी जग्गा कसरी भाडामा दिइयो भन्ने विषय गम्भीर रुपमा उठेको थियो । त्यतिबेला इम्बार्क कलेजका लागि जग्गा भाडामा लिन गरिएको टेण्डर प्रक्रिया नै विवादमा परेको थियो ।

कतिपयले गोल्छाले त्यो बेला तत्कालीन पुल्चोक क्याम्पस व्यवस्थापनलाई प्रभावमा पारेर क्याम्पसकै हाताभित्र कलेज स्थापना गर्न सफल भएको आरोपसमेत लगाएका थिए । त्यो बेला पुल्चोक क्याम्पसको प्रमुख इन्द्र आचार्य थिए । उनले गोल्छाको क्याम्पसले व्यवस्थापन पढाउने र पुल्चोक इन्जिनियरिङ क्याम्पस भएकाले भाडामा दिएको प्रष्टीकरण दिएका थिए । ‘स्वार्थको द्वन्द्व हुने किसिमले विवादास्पद रुपमा पुल्चोक क्याम्पसको जग्गा गोल्छा समूहलाई कलेज स्थापना गर्नका लागि दिइयो,’ पुल्चोक कलेजका एक कर्मचारी भन्छन्, ‘आफ्नै विद्यार्थीहरुका लागि पर्याप्त ठाउँ र पूर्वाधार अझै अभाव छ ।’

गोल्छाले नविल बैंक भाडा बसेको पुल्चोक क्याम्पसको भवनसहितको जग्गा मासिक १८ लाख रुपैयाँ तिर्ने गरी भाडामा लिएका थिए । उक्त भवन र जग्गा इम्बार्क कलेज खोल्न दिँदा त्रिवि इन्जिनियरिङ अध्ययन संस्थान (आईओई) डिन कार्यलयलाई पनि गुमराहमा राखिएको थियो । नविल बैंक उक्त स्थानबाट हटेपछि कलेज र क्याम्पसबाहेकलाई उक्त भवन र जग्गामा भाडामा दिन डिन कार्यलयको निर्देशन थियो ।

तर, डिन कार्यलयको उक्त निर्देशन लत्याउँदैं तत्कालीन क्याम्पस नेतृत्वले गोल्छाको निजी कलेजलाई भाडामा दिने विवादास्पद निर्णय गरेको थियो । १३ मंसिर २०८१ मा शिक्षा, विज्ञान तथा प्रविधि मन्त्रालयबाट सञ्चालन अनुमति पाएको इम्बार्क कलेजले युनिभर्सिटी अफ रोह्याम्प्टन युकेसँग शैक्षिक साझेदारीमा बिजनेस म्यानेजमेन्ट र एमबीएलगायतका कोर्सहरु सञ्चालन गरिरहेको छ । अहिलेका प्रधानमन्त्री बालेन्द्र शाह काठमाडौं महानगरपालिकाको मेयर हुँदा स्कुलमा सटर भाडामा दिएर कमिसनको चक्कर चलाउनेहरुमाथि डण्डा चलाएका थिए । जसका कारण पुल्चोक क्याम्पसको हाताभित्रै निजी कलेज खोल्न दिने तत्कालीन क्याम्पस प्रशासनको विवादित निर्णय बालेन सरकारले सच्चाउन सक्ने धेरैको आँकलन छ ।