जेठ १४ गते सार्वजनिक बिदा

काठमाडौं । सरकारले इस्लाम धर्मावलम्बीहरूको महान पर्व बकर इद (इद–उल–अजहा) को अवसरमा जेठ १४ गते सार्वजनिक बिदा दिने निर्णय गरेको छ । गृह मन्त्रालयले  सूचना जारी गर्दै उक्त दिन देशभर सार्वजनिक बिदा रहने जानकारी गराएको हो ।

मन्त्रालयले नेपाल राजपत्रमा प्रकाशित वार्षिक सार्वजनिक बिदासम्बन्धी सूचनाअनुसार मुस्लिम आयोगबाट प्राप्त जानकारीका आधारमा यस वर्ष बकर इद जेठ १४ गते बिहीबार परेको जनाएको छ । सोहीअनुसार संघ, प्रदेश तथा स्थानीय तहका सरकारी कार्यालय, शैक्षिक संस्था तथा सार्वजनिक निकायहरूमा सार्वजनिक बिदा लागू हुने भएको छ ।

बकर इद इस्लाम धर्मावलम्बीहरूको महत्वपूर्ण धार्मिक पर्वका रूपमा मनाइन्छ । यस पर्वमा मुस्लिम समुदायले नमाज अदा गर्ने, कुरबानी दिने तथा आपसी सद्भाव र सहयोग साटासाट गर्ने परम्परा रहेको छ । नेपालसहित विश्वभर रहेका मुस्लिम समुदायले यस पर्वलाई विशेष श्रद्धा र उत्साहका साथ मनाउने गर्दछन् ।

गृह मन्त्रालयले पर्वको अवसरमा स्वदेश तथा विदेशमा रहेका सम्पूर्ण इस्लाम धर्मावलम्बी नेपाली दिदीबहिनी तथा दाजुभाइहरूमा शुभकामना व्यक्त गरेको छ । मन्त्रालयले धार्मिक सहिष्णुता, सामाजिक सद्भाव र राष्ट्रिय एकतालाई अझ मजबुत बनाउन यस्ता पर्वले महत्वपूर्ण भूमिका खेल्ने विश्वास समेत व्यक्त गरेको छ ।

सरकारले प्रत्येक वर्ष विभिन्न धर्म, संस्कृति र समुदायका पर्वलाई सम्मान गर्दै सार्वजनिक बिदा दिने व्यवस्था गर्दै आएको छ ।