कक्षा १२ को नतिजा : रिटोटलिङ नगरी सिधै रिचेकिङ गर्न पाइन्छ ?

कक्षा १२ को नतिजा चित्त नबुझेका धेरै विद्यार्थीमा रिचेकिङका लागि सिधै आवेदन दिन पाइन्छ कि पाइँदैन भन्ने अन्योल देखिएको छ । राष्ट्रिय परीक्षा बोर्डका अनुसार विद्यार्थीले चरणबद्ध प्रक्रियाअनुसार अगाडि बढ्नुपर्छ । रिटोटलिङ नगरी सिधै उत्तरपुस्तिकाको पुनःपरीक्षण (रिचेकिङ) गर्न पाइँदैन ।

यस्तो छ प्रक्रिया :

🔹 पहिलो चरण : Retotaling
प्रति विषय १ हजार रुपैयाँ तिरेर पुनर्योग (Retotaling) का लागि आवेदन दिनुपर्छ ।

🔹 दोस्रो चरण : उत्तरपुस्तिका हेर्ने
Retotaling को नतिजा पनि चित्त नबुझेमा प्रति विषय १ हजार ५ सय रुपैयाँ तिरेर उत्तरपुस्तिका हेर्न पाइन्छ ।

🔹 तेस्रो चरण : उत्तरपुस्तिका पुनःपरीक्षण (रिचेकिङ)
उत्तरपुस्तिका हेरेर पनि चित्त नबुझेमा प्रति विषय २ हजार रुपैयाँ तिरेर उत्तरपुस्तिकाको पुनःपरीक्षण गर्न सकिन्छ । यसका लागि विद्यार्थी र अभिभावकको उपस्थिति अनिवार्य गरिएको छ ।

बोर्डका परीक्षा नियन्त्रक कृष्ण शर्माका अनुसार प्रक्रियाअनुसार चरणबद्ध रूपमा अगाडि बढ्नुपर्ने भएकाले रिटोटलिङ नगरी सिधै रिचेकिङका लागि आवेदन दिन पाइँदैन ।