सशस्त्र प्रहरीको स्कुलमै करोडौं हिनामिना !

काठमाडौं। कीर्तिपुरस्थित सशस्त्र प्रहरी बलको विद्यालयमा आर्थिक अनियमितता भएको आरोपमा विद्यालयकी लेखा प्रमुखसहित दुई जनालाई प्रहरीले पक्राउ गरेको छ । दुवै जनामाथि विद्यालयको रकम हिनामिना गरेको आरोपमा अनुसन्धान अघि बढाइएको हो ।

पक्राउ पर्नेमा सशस्त्र प्रहरी निरीक्षक (इन्स्पेक्टर) तथा विद्यालयकी लेखा प्रमुख कल्पना गुरुङ र लिला लामा रहेका छन् । जिल्ला प्रहरी परिसर काठमाडौंले शनिबार उनीहरूलाई नियन्त्रणमा लिएको जनाएको छ ।

परिसरका प्रवक्ता तथा एसपी पवनकुमार भट्टराईका अनुसार अदालतबाट म्याद थप गरी दुवै जनामाथि थप अनुसन्धान सुरु गरिएको छ ।

प्रहरीका अनुसार सशस्त्र प्रहरी बलको प्रधान कार्यालयले विद्यालयमा आर्थिक अनियमितता भएको आशंकापछि आन्तरिक छानबिन गरेको थियो । छानबिनका क्रममा केही व्यक्तिको संलग्नता देखिएपछि कानुनी अनुसन्धानका लागि जिल्ला प्रहरी परिसर काठमाडौंलाई पत्राचार गरिएको थियो ।

अनुसन्धानको प्रारम्भिक चरणमा विद्यालयको खातामा जम्मा हुनुपर्ने रकम व्यक्तिगत खातामा राखिएको र त्यसबाट करोडौं रुपैयाँ बराबरको हिनामिना भएको आशंका गरिएको छ। यही आरोपका आधारमा पक्राउ परेकामाथि थप अनुसन्धान भइरहेको प्रहरीले जनाएको छ।

स्रोतका अनुसार यस प्रकरणमा लेखा प्रमुख कल्पना गुरुङको भूमिका प्रमुख रहेको आशंकामा अनुसन्धान केन्द्रित गरिएको छ। उनी करिब छ वर्षदेखि उक्त विद्यालयको लेखा शाखामा कार्यरत रहेकी थिइन् ।

घटनासँग सम्बन्धित विषयमा सशस्त्र प्रहरीको कल्याण शाखामा कार्यरत महेन्द्र हमालमाथि पनि छानबिन भइरहेको बताइएको छ। अनुसन्धान जारी रहेकाले यस प्रकरणमा अन्य व्यक्तिको संलग्नता भए नभएको विषय पनि खुल्ने अपेक्षा गरिएको प्रहरीले जनाएको छ ।