काठमाडौं विश्वविद्यालयको उपकुलपतिमा प्रा.डा. विवेक बराल नियुक्त

काठमाडौं विश्वविद्यालयको उपकुलपतिको जिम्मेवारी प्रा.डा. विवेक बरालले पाएका छन्। विश्वविद्यालयका कुलपतिसमेत रहेका प्रधानमन्त्री वालेन्द्र शाहले शुक्रबार बराललाई उपकुलपति नियुक्त गरेका हुन्।

उपकुलपति छनोटका लागि शिक्षा तथा खेलकुदमन्त्री सस्मित पोखरेलको संयोजकत्वमा गठित समितिले बरालसहित तीन जना प्राध्यापकको नाम सिफारिश गरेको थियो। समितिको सिफारिशमा प्रा.डा. बालचन्द्र लुइटेल र प्रा.डा. राजेन्द्र जोशी पनि थिए।

काठमाडौं विश्वविद्यालयको इन्जिनियरिङ पृष्ठभूमिका बराल लामो समयदेखि विश्वविद्यालयको प्राज्ञिक तथा अनुसन्धान क्षेत्रमा सक्रिय छन्। उनी विश्वविद्यालयको मेकानिकल इन्जिनियरिङ विभागमा प्राध्यापकका रूपमा कार्यरत छन्। केयूको दोस्रो ब्याचका इन्जिनियरिङ विद्यार्थीसमेत रहेका उनले यही संस्थामा आफ्नो विद्यार्थी जीवनदेखि प्राध्यापन र अनुसन्धानसम्मको लामो यात्रा तय गरेका छन्।

बरालले जापानको टोकियो विश्वविद्यालयबाट स्नातकोत्तर तथा न्यूजिल्यान्डको अकल्यान्ड विश्वविद्यालयबाट मेकानिकल इन्जिनियरिङमा विद्यावारिधि गरेका छन्। उच्च शिक्षा पूरा गरेपछि नेपाल फर्किएका उनी सन् १९९९ मा काठमाडौं विश्वविद्यालयमा लेक्चररका रूपमा आबद्ध भएका थिए। करिब २७ वर्षभन्दा लामो प्राज्ञिक यात्रापछि उनी सन् २०१८ मा विश्वविद्यालयका प्राध्यापक बने।

प्राध्यापनसँगै बराल अनुसन्धानका क्षेत्रमा पनि सक्रिय छन्। उनले धुलिखेल र विराटनगरका परम्परागत तथा आधुनिक भवनमा तापक्रम व्यवस्थापन, ऊर्जा खपत र भित्री वातावरणको सहजतासम्बन्धी प्राविधिक अध्ययन गरेका छन्।

त्यस्तै, विद्युतीय सवारी साधनमा प्रयोग हुने ब्याट्रीको ताप व्यवस्थापन उनको अनुसन्धानको अर्को महत्वपूर्ण क्षेत्र हो। ब्याट्री अत्यधिक तात्न नदिन तथा विद्युतीय सवारीको कार्यक्षमता सुधार गर्न नानोफ्लुइड्सको प्रयोगसम्बन्धी अनुसन्धानमा समेत उनी संलग्न छन्।

विश्वविद्यालयको प्राध्यापक संघको नेतृत्वसमेत गरिसकेका बरालले प्राध्यापक तथा शैक्षिक क्षेत्रका हकहितका विषयमा भूमिका निर्वाह गरेका थिए। प्राध्यापन, अनुसन्धान र विश्वविद्यालयको आन्तरिक शैक्षिक नेतृत्वमा लामो अनुभव भएका बराल अब काठमाडौं विश्वविद्यालयको समग्र नेतृत्व गर्ने जिम्मेवारीमा पुगेका छन्।