शिक्षक–कर्मचारीदेखि ईसीडी सहजकर्तासम्मको पारिश्रमिक बढ्यो, कसको कति ?

काठमाडौं । सरकारले संघीय अनुदानअन्तर्गत कार्यरत शिक्षक तथा विद्यालय जनशक्तिको पारिश्रमिक वृद्धि गर्ने निर्णय गरेको छ। शिक्षा तथा खेलकुद मन्त्रालयको प्रस्तावमा सरकारले प्रारम्भिक बालविकास (ईसीडी) सहजकर्ता, विद्यालय कर्मचारी तथा विद्यालय सहयोगीको पारिश्रमिक अनुदानमा मासिक रु. ५ हजार थप गर्ने निर्णय गरेको हो।

शिक्षा तथा खेलकुद मन्त्री सस्मित पोखरेलले सामाजिक सञ्जालमार्फत सार्वजनिक गरेको जानकारीअनुसार संघीय सरकारबाट उपलब्ध गराउँदै आएको पारिश्रमिक अनुदानमा वृद्धि गरिएको हो।

त्यस्तै, संघीय शिक्षण सहयोग अनुदान कोटामा कार्यरत शिक्षकहरूको पारिश्रमिकसमेत बढाइने भएको छ। साबिकमा खाइपाई आएको पारिश्रमिक वृद्धि गर्दै माध्यमिक तृतीय श्रेणी र निम्न माध्यमिक तृतीय श्रेणी शिक्षकको सुरु तलब बराबर कायम गरिने मन्त्री पोखरेलले बताएका छन्।

मन्त्री पोखरेलका अनुसार यो निर्णयबाट राज्यको वार्षिक दायित्वमा रु. ४ अर्ब ६८ करोड ९८ लाख २८ हजार १०० थपिनेछ।

उनले विद्यालय शिक्षामा आवश्यक जनशक्ति र स्रोतको व्यवस्थित व्यवस्थापनका लागि सरकार प्रतिबद्ध रहेको बताएका छन्। विद्यालय कर्मचारी, शिक्षक तथा सहयोगी जनशक्तिको योगदानको सम्मान गर्दै विद्यालय शिक्षाको गुणस्तर सुधारका लागि आगामी दिनमा समेत आवश्यक पहल गर्ने उनको भनाइ छ।

मन्त्री पोखरेलले सीमित स्रोतका बीच पनि निर्णय कार्यान्वयनका लागि आवश्यक सहजीकरण गरेको भन्दै अर्थमन्त्रीप्रति धन्यवादसमेत व्यक्त गरेका छन्।

सरकारले गरेको यो निर्णयले लामो समयदेखि पारिश्रमिक तथा सेवा–सुविधाको विषयमा आवाज उठाउँदै आएका विद्यालयका सहयोगी जनशक्तिलाई प्रत्यक्ष राहत पुग्ने अपेक्षा गरिएको छ। तथापि, मन्त्री स्वयंले पनि यो निर्णय मात्र पर्याप्त नभएको र विद्यालय शिक्षाको जनशक्ति व्यवस्थापन तथा पारिश्रमिकसम्बन्धी समस्या समाधानका लागि थप पहल आवश्यक रहेको संकेत गरेका छन्।