बाढीले खण्डहर बनाएको त्रिभुवन त्रिशूली माविको पुनःस्थापनाका लागि चौधरी फाउन्डेसनले सहयोग गर्ने

काठमाडौं । भोटेकोशी र त्रिशुली नदीमा आएको विनाशकारी बाढीले खण्डहर बनाएको  नुवाकाेटकाे त्रिभुवन त्रिशूली माध्यमिक विद्यालयको शैक्षिक वातावरण पुनःस्थापनाका लागि चौधरी फाउन्डेसनले सहयोग गर्ने भएको छ ।

चौधरी फाउन्डेसनका निर्वाण चौधरीले विद्यालयका प्रधानाध्यापक राजेन्द्र दवाडीसँग भेट गर्दै विद्यालयको तत्कालीन आवश्यकता सम्बोधन गर्न सहयोग उपलब्ध गराउने प्रतिबद्धता जनाएका हुन् ।

फाउन्डेसनले विद्यालयका लागि कक्षाकोठाका फर्निचर, डिजिटल बोर्ड, ल्यापटप, विद्यालय झोला तथा स्टेशनरी सामग्री उपलब्ध गराउने जनाएको छ । त्यसका साथै विद्यार्थीको मानसिक तथा मनोसामाजिक कल्याण, शिक्षकको क्षमता अभिवृद्धि तथा विद्यालयमा इन्टरनेट कनेक्टिभिटीका लागि पनि सहयोग गरिने चौधरीले बताएका छन् ।

हालै आएको बाढीका कारण विद्यालयसहित आसपासका क्षेत्रमा ठूलो क्षति पुगेको थियो । विपद्का क्रममा विद्यालयका विद्यार्थीको सुरक्षाका लागि प्रधानाध्यापक दवाडीले देखाएको तत्परता र नेतृत्वको चौधरीले प्रशंसा गरेका छन् ।

चौधरीले विद्यालयको भौतिक संरचना पुनःस्थापनासँगै विद्यार्थीको सिकाइ र मनोवैज्ञानिक अवस्थालाई समेत प्राथमिकतामा राखेर सहयोग अघि बढाइने बताएका छन् ।

‘विद्यालय पुनर्निर्माण भनेको कक्षाकोठा मात्रै बनाउनु होइन, विद्यार्थी र समुदायमा आशा पुनःस्थापित गर्नु पनि हो’ भन्ने धारणा राख्दै चौधरी फाउन्डेसनले प्रभावित विद्यालयको शैक्षिक वातावरण पुनःनिर्माणमा सहयोग गर्ने जनाएको छ ।