शिक्षक सेवा आयोगले सार्वजनिक गर्‍यो वार्षिक कार्यतालिका, यस्तो छ परीक्षा र पदपूर्तिको समय

काठमाडौं । शिक्षक सेवा आयोगले आर्थिक वर्ष २०८३/०८४ का लागि अध्यापन अनुमतिपत्र तथा शिक्षक पदपूर्तिसम्बन्धी वार्षिक कार्यतालिका सार्वजनिक गरेको छ । आयोगबाट स्वीकृत २०८३ असोज १ गतेको को कार्यतालिकामा विभिन्न तहका शिक्षक पदपूर्ति, अध्यापन अनुमतिपत्र तथा खुला प्रतियोगितात्मक परीक्षासम्बन्धी कामको समय निर्धारण गरिएको छ ।

कार्यतालिकाअनुसार प्राथमिक, निम्नमाध्यमिक र माध्यमिक तहको द्वितीय तथा प्रथम श्रेणीमा बढुवातर्फ २५ प्रतिशत आन्तरिक प्रतियोगितात्मक र ७५ प्रतिशत कार्यसम्पादन मूल्याङ्कनका आधारमा प्रक्रिया अघि बढाइनेछ । २५ प्रतिशत आन्तरिक प्रतियोगितात्मकतर्फ विज्ञापन/सूचना पुसमा प्रकाशन गर्ने र विषयगत परीक्षा माघमा सञ्चालन गर्ने कार्यतालिकामा उल्लेख छ । यसको नतिजा फागुनमा प्रकाशन गरी अन्तर्वार्ता तथा अन्तिम नतिजा चैतमा गर्ने उल्लेख छ ।

त्यस्तै, माध्यमिक तहको अध्यापन अनुमतिपत्रका लागि विज्ञापन कात्तिकमा र परीक्षा माघमा सञ्चालन गर्ने कार्यतालिका छ । नतिजा माघमै प्रकाशन गर्ने र नतिजा प्रकाशित भएको १ महिनाभित्र अध्यापन अनुमतिपत्र वितरण गर्ने उल्लेख गरिएको छ ।

निम्नमाध्यमिक तहको अध्यापन अनुमतिपत्रका लागि विज्ञापन मंसिरमा, परीक्षा माघमा र नतिजा फागुनमा प्रकाशन गर्ने कार्यतालिका आयोगले तय गरेको छ । यसमा पनि नतिजा प्रकाशित भएको १ महिनाभित्र अध्यापन अनुमतिपत्र वितरण गरिनेछ ।

खुला प्रतियोगितात्मकतर्फ माध्यमिक तृतीय श्रेणीका लागि विज्ञापन फागुनमा, लिखित परीक्षा वैशाख–असारमा र नतिजा वैशाखमै प्रकाशन गर्ने उल्लेख छ। निम्नमाध्यमिक तृतीय श्रेणीका लागि विज्ञापन चैतमा, लिखित परीक्षा जेठ–असारमा र नतिजा जेठमा प्रकाशन गर्ने कार्यतालिका छ ।

त्यस्तै, माध्यमिक तथा निम्नमाध्यमिक तृतीय श्रेणीको गत आर्थिक वर्षको बाँकी पदपूर्तिसम्बन्धी कामसमेत कार्यतालिकामा समेटिएको छ । माध्यमिकतर्फ विषयगत परीक्षा मंसिरमा, नतिजा फागुनमा तथा अन्तर्वार्ता र अन्तिम नतिजा चैतमा गर्ने उल्लेख छ। निम्नमाध्यमिकतर्फ सामान्य परीक्षा मंसिरमा, विषयगत परीक्षा माघमा, नतिजा मंसिर/फागुनमा र अन्तिम प्रक्रिया चैतमा गर्ने कार्यतालिका छ।

करार सूची प्रकाशनअन्तर्गत खुला प्रतियोगितात्मक परीक्षाको नतिजा सिफारिस भएको एक महिनाभित्र सूची प्रकाशन गर्ने उल्लेख गरिएको छ ।

आयोगले प्राथमिक, निम्नमाध्यमिक र माध्यमिक तहको द्वितीय तथा प्रथम श्रेणीमा बढुवाका लागि २५ प्रतिशत आन्तरिक प्रतियोगितात्मक तथा ७५ प्रतिशत कार्यसम्पादन मूल्याङ्कनतर्फको प्रक्रियालाई समेत वार्षिक कार्यतालिकामा समेटेको छ। बढुवातर्फको अन्तिम नतिजा तथा सिफारिससम्बन्धी काम आषाढदेखि भदौसम्म गर्ने र अघिल्लो आर्थिक वर्षका बाँकी कामसमेत सोहीअनुसार अघि बढाउने उल्लेख छ।

आयोगले शिक्षा विभागबाट तहगत पदपूर्तिका लागि विवरण प्राप्त भएपछि कार्यतालिकाबमोजिम पदपूर्तिको कामकारबाही गरिने जनाएको छ।