कोरिया छोडेर नेपाल फर्किएका दिनेश बने माध्यमिक तहको शिक्षक

काठमाडौं । दक्षिण कोरिया । पछिल्लो समय नेपाली युवाहरुको सपनाको देश बन्दै गएको छ । इपीएस भाषा परीक्षामार्फत निर्माण, कृषिलगायतका क्षेत्रमा यतिबेला लाखौं नेपाली युवाले कोरियालाई आफ्नो कर्मथलो बनाइरहेका छन् । यही भीडमा थिए मोरङका दिनेश बुढाथोकी । तर, यतिबेला उनको परिचय र दैनिकी फेरिएको छ ।
२०७२ सालमा दक्षिण कोरियातर्फ लागेका दिनेश करिव ५ वर्षको कोरिया बसाईपछि २०७७ सालमा नेपाल फर्किएका थिए । एकपटक कोरिया गएर आएपछि फर्किने युवाहरु धेरै हुन्छन् । तर, दिनेश भने नेपालमै रोकिए ।

गणित विषयमा बी.एड गरेका दिनेशले शिक्षक सेवा आयोगको तयारी गर्न थाले । २०७९ सालमा आयोगले मोरङमा प्राथमिक तह शिक्षकका लागि विज्ञापन गर्यो । त्यसमा आवेदन दिएका दिनेशले पहिलो प्रयासमै प्राथमिक तृतीय तहमा सिफारिस भए ।

यतिबेला उनी माध्यमिक तह तृतीय श्रेणी गणित विषयका लागि कोशी प्रदेशबाट ताप्लेजुङमा सिफारिस भएका छन् ।

उनकी श्रीमती बबिता पराजुली पनि मोरङको विराटनगरस्थित पोखरिया माविमा माध्यमिक तहको स्थायी अंग्रेजी शिक्षकका रुपमा कार्यरत छिन् ।