शिक्षामा ६३ अर्बले बढ्यो बजेट

काठमाडौं । सरकारले आगार्मी आर्थिक वर्ष २०८१/८२ का लागि शिक्षा क्षेत्रको बजेट वृद्धि गरेको छ । आगामी वर्षका लागि सरकारले शिक्षा क्षेत्रमा दुई खर्ब तीन अर्ब ६६ करोड रुपैयाँ विनियोजन गरेको छ । यो गत वर्षको भन्दा ६३ अर्ब ७० करोडले बढी हो ।

मंगलबार प्रतिनिधि सभामा बजेट भाषण गर्दै अर्थमन्त्री वर्षमान पुनले सार्वजनिक गरेको बजेटले गुणस्तरीय शिक्षामा आमनागरिकको पहुँच बढाई शिक्षित र मर्यादित समाजको विकास निर्माणमा जोड दिइएको छ। त्यस्तै शिक्षालाई जीवनोपयोगी, आधुनिक, विज्ञान प्रविधिमा आधारित, व्यावसायिक र अनुसन्धानमुखी बनाउँदै लैजाने र प्राविधिक शिक्षामा लगानी तथा गुणस्तर अभिवृद्धि गरिने विषयलाई पनि सरकारले प्राथमिकता दिएको छ ।

सरकारले हाल प्रदान गर्दै आएको विपन्न, दलित, सीमान्तकृत तथा मुलुकभरका छात्रालाई प्रदान गर्दै आएको छात्रवृत्ति कार्यक्रमलाई निरन्तरता दिएको छ ।