एकीकृत समाजवादीका उपाध्यक्ष भुसाल शिक्षामन्त्री बन्दैं

काठमाडौं– नेकपा एकीकृत समाजवादी उपाध्यक्ष बेदुराम भुसाल शिक्षा, विज्ञान तथा प्रविधी मन्त्री बन्ने भएका छन् । बालुवाटार स्रोतकाअनुसार समाजवादीले पाउने दुई मन्त्रालयमध्ये शिक्षाको नेतृत्व भुसालले गर्न लागेका हुन् ।

राष्ट्रिय सभा सदस्य रहेका भुसाललाई यसअघि कृषि वा श्रम मन्त्रालयमध्ये एक रोज्न भनिएको थियो । तर, कृषि र श्रम छाडेर शिक्षा मन्त्रालयमा रुचि देखाएका थिए ।

एकीकृत समाजवादीले पाउने अर्को मन्त्रालय भने उपमहासचिव प्रकाश ज्वालाले सम्हाल्नेछन् । उनले भौतिक पूर्वाधार तथा यातायात मन्त्रालय सम्हाल्ने बताइएको छ ।

अहिले भौतिक पूर्वाधार मन्त्रालय माओवादी नेता नारायणकाजी श्रेष्ठले सम्हालिरहेका छन् । ज्वाला भौतिक पूर्वाधार मन्त्री बनेसँगै नारायणकाजी भने गृहमन्त्री बन्नेछन् ।