एसईईको ग्रेडवृद्धि परीक्षा साउन २३ देखि ३१ गतेसम्म, एनजी पाएका सबै विद्यार्थीले परीक्षा दिन पाउने

काठमाडौं । राष्ट्रिय परीक्षा बार्डले एसईईको ग्रेड वृद्धि (पुरक) परीक्षा २३ साउनदेखि ३१ गतेसम्म सञ्चालन गर्ने भएको छ । बोर्डको परीक्षा नियन्त्रण कार्यालय (कक्षा १०) र शिक्षा विज्ञान तथा प्रविधि मन्त्रालयको संयुक्त बैठकले साउन २३ देखि ३१ गतेसम्म ग्रेडवृद्धि परीक्षा सञ्चालन गर्ने निर्णय गरेको परीक्षा नियन्त्रक नन्दलाल पौडेलले जानकारी दिए ।

बोर्डले यसअघि दुई विषयसम्म एनजी पाएका विद्यार्थीहरुको साउन १८ र १९ गतेलाई ग्रेडवृद्धि परीक्षा लिने निर्णय गरेको थियो । तर, असार १४ गते शिक्षा मन्त्रालयले मन्त्री स्तरीय निर्णय गर्दै एनजी पाएका सबै विद्यार्थीलाई परीक्षामा सहभागी गराउन निर्देशन दिएको थियो । योसँगै आइतबार बसेको बैठकले साउन २३ गतेबाट परीक्षा गर्ने निर्णय गरेको हो । एसईईको नतिजाअनुसार २ लाख ४२ हजार ३१३ विद्यार्थी नन ग्रेडेड भएका छन् । अब यी सबै विद्यार्थीले मौका परीक्षा दिन पाउनेछन् ।