उत्तरपुस्तिका हराएको प्रकरणमा के गर्दैछ त्रिवि ?

काठमाडौं । त्रिभुवन विश्वविद्यालयले उत्तर पुस्तिका हराएको विषयमा छानबिन समितिले बुझाएको प्रतिवेदन अध्ययन पुरा गरी कारबाही अघि बढाउने भएको छ । त्रिविले केही दिन भित्र उक्त प्रतिवेदनका आधारमा कारबाहीको निर्णय गर्न लागेको हो ।

त्रिविले २०८० सालको वैशाख मैहिनामा सञ्चालन गरेको स्नातक तह प्रथम वर्षको मानविकी तथा सामाजिक शास्त्र संकाय अन्तर्गत जनसङ्ख्या तथा स्वास्थ्य विषय (४२२) र शिक्षा शास्त्र सङ्काय तर्फको शिक्षाको आधार विषय (४१२) का उत्तर पुस्तिका हराएको थियो । यसरी उत्तरपुस्तिका हराएपछि त्रिविले समयमै नतिजासमेत सार्वजनिक गर्न नसक्दा आलोचना भएको थियो ।

त्यसपछि त्रिविले १५ चैतमा राष्ट्रिय परीक्षा बोर्डका पूर्व अध्यक्ष तथा त्रिविका पूर्व रजिष्ट्रार प्रा.डा चन्द्रमणि पौडेलको संयोजकत्वमा तीन सदस्यीय उच्चस्तरीय समिति गठन गरेको थियो । उक्त समितिले त्रिवि परीक्षा नियन्त्रण कार्यालयका नियन्त्रक पुष्पराज जोशीसहित विभिन्न व्यक्तिलाई कारबाहीका लागि सिफारिस गरको थियो ।