बंगलादेशबाट १७ जना विद्यार्थी नेपाल आइपुगे, अरुको अवस्था के छ ?

काठमाडौं- बंगलादेशमा प्रर्दशन हिंसात्मक बन्दै गएपछि अध्ययनमा गएका थप १७ जना नेपाली विद्यार्थी आइतबार नेपाल फर्किएका छन् । परराष्ट्र मन्त्रालयका प्रवक्ता अमृतबहादुर राईका अनुसार १७ जना विद्यार्थी बिहान ११ः३० बजे त्रिभुवन अन्तराष्ट्रिय विमानस्थलमा आइपुगेका हुन् ।

ढाकामा रहेका ती विद्यार्थीहरु बिमान बंगलादेशको जहाजमार्फत नेपाल आइपुगेको प्रवक्ता राईले जानकारी दिए । राईका अनुसार हालसम्म ८ सयजना भन्दा बढी विद्यार्थी नेपाल आइपुगेका छन् । ‘अहिले ढाकामा रहनुभएका सम्पूर्ण नेपाली विद्यार्थीहरु सुरक्षित हुनुहुन्छ,’ उनले भने, ‘यदि कसैलाई समस्या परेको छ भने दुतावासमा सम्पर्क गरेर सहयोग लिन आग्रह गर्दछौँ ।’

बंगलादेशमा एक सातायता सरकारी सेवामा विशेष आरक्षणको विरोधमा हिंसात्मक आन्दोलन चर्किरहेको छ । उसो त हवाईमार्ग र स्थलमार्ग हुँदै नेपाली विद्यार्थीहरु नेपाल फर्किरहेको परराष्ट्र मन्त्रालयले जनाएको छ । ‘भातर हुँदै आउन चाहने विद्यार्थीका लागि सहजिकरण गरिदिन भारत सरकारलाई समेत आग्रह गरिसकेका छौँ,’ उनले भने, ‘बंगलादेशमा रहेका विद्यार्थी भारतको मेघालयलगायत सीमावर्ती राज्य हुँदै फर्किरहनुभएको छ ।’

राईका अनुसार नेपालबाट तीन हजारभन्दा बढी विद्यार्थीहरु अध्ययनका लागि बंगलादेशमा गएका छन् ।