दुई विषयसम्म अनुत्तीर्ण विद्यार्थीले मौका परीक्षा दिन पाउने त्रिभुवन विश्वविद्यालयको निर्णय

काठमाडौं – त्रिवि प्राज्ञिक परिषद्ले स्नातक तह अन्तर्गत अन्तिम वर्षको परीक्षामा दुई विषयसम्म अनुत्तीर्ण हुने विद्यार्थीले मौका परीक्षा दिन पाउने व्यवस्था गरेको छ । एक विषयमात्र अनुत्तीर्ण हुँदा विद्यार्थीको उच्च शिक्षा, रोजगारी तथा वैदेशिक अध्ययनका लागि बाटो बन्द भएको भन्दै परिषद्ले मौका परीक्षा दिन पाउने नीतिगत निर्णय गरेको हो ।

यसअघि कुनै विद्यार्थी एउटा विषयमा अनुत्तीर्ण भएमा उसले उक्त विषयको परीक्षा दिनका लागि एक वर्ष कुर्नुपर्ने बाध्यता थियो । त्यही बाध्यतालाई चिर्ने उद्धेश्यले मौका परीक्षा दिन पाउने व्यवस्था गरिएको त्रिविका उपकुलपति प्रा.डा. केशरजंग बराल बताउँछन् । ‘अन्तिम वर्षमा पुगेको विद्यार्थी एक वा दुईवटा विषयमा अनुत्तीर्ण भएर एक वर्ष उत्तिकै बस्दा उसले थुप्रै अवसरबाट बञ्चित हुने कुरालाइ मध्यनजर गदै मौका परीक्षाको व्यवस्था गरिएको हो,’ उनले भने ।

उपकुलपति बरालका अनुसार स्नातक तहको अन्तिम वर्षको परीक्षाफल प्रकाशित भएको दुईसाता भित्रै मौका परीक्षा सञ्चालन गरिने छ । ‘त्यसको नतिजा पनि छिट्टै प्रकाशित गर्छौं,’ उनी भन्छन्, ‘मौका परीक्षा दिएका विद्यार्थीलाई स्नातकोत्तरमा भर्ना हुन अप्ठ्यारो नपर्ने गरी समयमै परीक्षाफल प्रकाशित गर्छौं ।’

यो व्यवस्था लागू भएपछि वर्षेनी २० हजारभन्दा बढी विद्यार्थीले मौका परीक्षामा सहभागी हुने उपकुलपति बरालको अनुमान छ ।