आजै कक्षा १२ को नतिजा सार्वजनिक गर्ने बोर्डको तयारी

काठमाडौं– राष्ट्रिय परीक्षा बोर्डले कक्षा १२ को नतिजा आज (शुक्रबार) सार्वजनिक गर्ने तयारी गरेको छ । बोर्डका अध्यक्ष डा. महाश्रम शर्माका अनुसार आज नै नतिजा सार्वजनिक गर्ने तयारी गरिएको हो ।

गत वैशाख १४ देखि २६ गतेसम्म भएको परीक्षाको नतिजा बोर्डले सार्वजनिक गर्न लागेको हो । ‘हामी अन्तिम तयारीमा छौँ नतिजा प्रकाशनका लागि बोर्डको बैठक बस्ने तयारी भइरहेको छ,’ उनले भने, ‘कुनै प्राविधिक समस्या आएन भने आज नै हामी नतिजा सार्वजनिक गर्छौं ।’

कक्षा १२ को परीक्षामा देशभरबाट नियमिततर्फ एक लाख ९६ हजार नौ सय १४ छात्रा र एक लाख ९३ हजार नौ सय ३३ जना छात्र गरी तीन लाख ९० हजार आठ ४७ परीक्षार्थी सहभागी भएका थिए।

त्यस्तै, ग्रेडवृद्धितर्फ एक लाख ६ सय ५० विद्यार्थी सहभागी थिए । जसमा देशभरका पाँच हजार पाँच सय ४२ विद्यालयका विद्यार्थी कक्षा १२ को परीक्षामा सहभागी भएका थिए ।