कक्षा १२ को परीक्षा वैशाख २१ गतेबाट गर्ने बोर्डको निर्णय

काठमाडौं । राष्ट्रिय परीक्षा बोर्डले कक्षा १२ को परीक्षा वैशाख २१ गतेबाट गर्ने निर्णय गरेको छ । मंगबार प्रधानमन्त्री केपी शर्मा ओलीले बोर्डलाई कक्षा १२ को परीक्षा सार्न निर्देशन दिएसँगै बसेको बोर्डको बैठकले वैशाख २१ गतेबाट सुरु गर्ने निर्णय गरेको परीक्षा नियन्त्रक कृष्ण शर्माले एजुकेशनसमाचारलाई जानकारी दिए । ‘वैशाख २१ गतेबाट परीक्षा गर्ने निर्णय भएको छ,’ उनले भने ।

यसअघि बोर्डले ११ वैशाखबाट कक्षा १२ को परीक्षा सुरु गर्ने तयारी गरेको थियो । तर, तीन सातादेखि शिक्षा ऐनको माग गर्दै शिक्षकहरु आन्दोलित भएपछि शिक्षा मन्त्रालयको समेत बागडोर सम्हालेका प्रधानमन्त्री ओलीले परीक्षा सार्नका लागि निर्देशन दिन बाध्य भएका थिए ।

सोही अनुसार बोर्डले नयाँ मिति घोषणा गरेको हो । परीक्षा तालिका भने सोही अनुसार नै हुने परीक्षा नियन्त्रक शर्माले जानकारी दिए । ‘परीक्षाको मिति मात्र परिवर्तन भएको हो तालिका सोही अनुसार नै हुन्छ,’ उनले भने ।