आन्दोलनरत शिक्षकहरुबाटै पिटिए सिन्धुपाल्चोकस्थित बोल्दे विद्यालयका कार्यालय सहयोगी

काठमाडौं । आन्दोलनमा घुसपैठ गरेको भन्दै शिक्षकहरुहरुको आक्रमणमा परेका व्यक्ति विद्यालयको कार्यालय सहयोगी भएको पुष्टि भएको छ । आइतबार विजुलीबजारमा शिक्षकहरुको आन्दोलनलाई घुसपैठ गरेको भन्दै शिक्षकहरुले आक्रमण परेका व्यक्ति सिन्धुपाल्चोक जुगल गाउँपालिका–२ गुम्बास्थित बोल्दे आधारभूति विद्यालयका कार्यालय सहयोगी पेम्बा नुर्बु तामाङ रहेको पाइएको हो ।

नुर्बु केही दिन अघि मात्र शिक्षकहरुको आन्दोलनमा सहभागी हुन सिन्धुपाल्चोकबाट काठमाडौं आएका थिए । आइतबार शिक्षकहरुको आन्दोलनमा सहभागी भइरहेका बेला उनीमाथि शिक्षकहरु जाइलागेका हुन् ।

आन्दोलनमा घुसपैठ गरेको भन्दै शरीरका कपडासमेत च्यातेर उनीमाथि शिक्षकहरुले कुटपिट गरेका थिए । तामाङ नेपाल विद्यालय कर्मचारी परिषद् सिन्धुपाल्चोकको कार्यसमिति सदस्य समेत रहेको पाइएको छ । उनीमाथि शिक्षकहरुले हल्लाको भरमा आक्रमण गरेको भन्दै नेपाल शिक्षक कर्मचारी परिषद् बागमती प्रदेशले आपत्ति जनाएको छ ।

परिषद् बागमती प्रदेशका उपाध्यक्ष दीपक खतिवडाले लहैलहैमा आन्दोलनकारीले आन्दोलनमै सामेल भएका कर्मचारीलाई कुटपिट गर्नु आपत्तिजनक कुरा रहेको बताए । ‘पेम्बा नुर्बुमाथि घुसपैठको आरोप लगाउँदै जसरी कुटपिट गरिएको छ यो निन्दनीय छ,’ उनले भने, ‘यो दादागिरी शैली र अमानवताको पराकाष्ठा हो ।’
तामाङलाई जोगाउन खोज्दा शिक्षकहरुले आफूमाथि पनि प्रहार गरेको उनको भनाइ छ ।