बोर्डको बैठक बोलाइयो, एसईईको नतिजा प्रकाशनबारे निर्णय लिने

काठमाडौं । माध्यमिक शिक्षा परीक्षा (एसईई) को नतिजा प्रकाशनबारे निर्णय लिन राष्ट्रिय परीक्षा बोर्डले बैठक बोलाएको छ । बोर्डले दिउँसो १२ः३० बजे बस्ने गरी बोर्डको बैठक बोलाएको बोर्डका सदस्य सचिव जंगबहादुर अर्यालले एजुकेशन समाचारलाई जानकारी दिए ।

‘हामीले नतिजाकै विषयलाई लिएर छलफल गर्नका लािग बैठक बोलाएका छौँ,’ उनले भने, ‘नतिजा आजै प्रकाशन गर्ने या अर्को दिन भन्ने बारेमा चाहिँ बैठकले नै निर्णय लिन्छ ।’

उनका अनुसार, आज दुई चरणको बैठक बसेर एसईईको नतिजा सार्वजनिक गरी तयारी भइरहेको छ । यद्यपि, दोस्रो चरणको बैठक भने पहिलो चरणको बैठकमा भर पर्नेछ । ‘पहिलो चरणको बैठकमा राष्ट्रिय परीक्षा बोर्डअन्तर्गतको परीक्षा नियन्त्रण कार्यालयले नतिजा प्रकाशन गर्नेबारे ब्रिफिङ गर्नेछ । सो कार्यालयले बैठकमा नतिजा प्रकाशनको लागि तयारी पूरा भएको र कुनै पनि त्रुटि नभएको बताएको अवस्थामा पुनः दोस्रो बैठकको आह्वान गरिनेछ,’ उनले भने, ‘सो बैठकले नतिजा सार्वजनिक गर्ने आदेश दिन्छ । दोस्रो बैठक पछि नतिजा प्रकाशन गरिनेछ ।’

एसईईको नतिजा प्रकाशन असार ७ गतेभित्र सार्वजनिक गर्ने कार्यतालिका थियो । तर, वैशाखमा भएको शिक्षकहरुको आन्दोलनका कारण नतिजा प्रकाशन ढिलाइ भएको थियो । गत चैत ७ देखि चैत १९ गतेसम्म सञ्चालन भएको एसईई परीक्षामा करिब पाँच लाख १० हजार विद्यार्थी सहभागी भएका थिए ।