अनेरास्ववियु अध्यक्ष कडरियाले दिए राजीनामा

काठमाडौं । नेकपा (एमाले) निकट अनेरास्ववियुका अध्यक्ष सुजन कडरियाले आफ्नो पद त्यागेका छन्। उनले मंगलबार सामाजिक सञ्जाल फेसबुकमार्फत राजीनामाको घोषणा गरेका हुन्।

फेसबुकमा उनले लेखेका छन्, “विद्यार्थी आन्दोलनको अस्तित्व हिजो ढलेजस्तो महसुस भयो। विद्यालय पोसाकमा रहेका विद्यार्थीको ज्यान जोगाउनसम्म विद्यार्थी संगठनहरू असफल भए। यसले हाम्रो पुस्ताले अघि सारेको विद्यार्थी राजनीति नै निष्फल रहेको अनुभूति भयो।”

यही कारण उनले अनेरास्ववियु केन्द्रीय अध्यक्ष पदबाट अलग हुने निर्णय गरेका हुन्। साथै उनले जनताको सेवामा निरन्तर सक्रिय रहने प्रतिवद्धता जनाएका छन्।

कडरियाले सरकारले आन्दोलनलाई दमन गरेर जनभावनाविपरीत काम गरिरहेको दाबी गर्दै यसको परिणाम गम्भीर र भयावह हुन सक्ने चेतावनी पनि दिएका छन्। “मेरो जीवनकै सबैभन्दा कालो दिन हो यो,” उनले भनेका छन्।