दाङमा शैक्षिक तथा प्रविधिक हब निर्माण प्रक्रिया अगाडि बढ्यो, घोराहीमै कम्प्युटर इन्जिनियरिङ सुरु गरिने

काठमाडौं । लामो समयदेखि अलपत्र अवस्थामा रहेको त्रिभुवन विश्वविद्यालय  अन्तर्गतको इन्जिनियरिङ अध्ययन संस्थान घोराही क्याम्पसको निर्माण प्रक्रिया औपचारिक रूपमा अगाडि बढेको छ । स्रोत सुनिश्चित भएसँगै क्याम्पस निर्माणका लागि टेन्डर प्रक्रिया पूरा गरी सम्झौता सम्पन्न गरिएको हो ।

कुल तीस करोड रुपैयाँ स्रोत सुनिश्चित भएपछि २०८२ साल वैशाख २३ गते बोलपत्र आह्वान गरिएको थियो । बोलपत्र प्रक्रियापछि २० करोड २७ लाख ४० हजार २ सय २१ माम २०८२ साल मंसिर ८ गते निर्माण सम्झौता गरिएको सम्बन्धित निकायले जनाएको छ । अब निर्माण कार्य तीव्र गतिमा अगाडि बढाइने र २०८४ भित्र सम्पन्न गर्ने लक्ष्य राखिएको छ ।

निर्माण सम्पन्न भएपछि क्याम्पसमा कम्प्युटर इन्जिनियरिङ् कार्यक्रम सञ्चालन गरिने तयारी छ । अत्याधुनिक पूर्वाधारसहित सञ्चालनमा आउने यस क्याम्पसले दाङलाई सूचना प्रविधिको केन्द्रका रूपमा स्थापित गर्ने अपेक्षा गरिएको छ । स्थानीय तहका जनप्रतिनिधि तथा सरोकारवालाले यस परियोजनाले जिल्लामा प्राविधिक शिक्षा विस्तार , रोजगारी सिर्जना तथा आर्थिक गतिविधिमा सकारात्मक प्रभाव पार्ने विश्वास व्यक्त गरेका छन् ।

दाङलाई ‘नेपाली सिलिकन भ्याली’ का रूपमा विकास गर्ने दीर्घकालीन सोचसहित अघि बढाइएको यस परियोजनाले जिल्लाको शैक्षिक तथा प्रविधिक क्षेत्रको विकासमा नयाँ आयाम थप्ने अपेक्षा गरिएको छ ।