शिक्षामन्त्रीद्वारा पदभारपछि पहिलो निर्णय परम्परामा सस्मितको ‘ब्रेक’

काठमाडौं । नवनियुक्त शिक्षा, विज्ञान तथा प्रविधि मन्त्री सस्मित पोखरेल ले पदभार ग्रहणलगत्तै पहिलो निर्णय गर्ने पुरानो परम्परामा ‘ब्रेक’ लगाएका छन् ।

शुक्रबार सपथ ग्रहणपछि पदभार सम्हाल्न सिंहदरबार स्थित मन्त्रालय पुगेका मन्त्री पोखरेलले तत्काल कुनै निर्णय नगरेका हुन्। उनले प्रधानमन्त्री बालेन्द्र शाह को समग्र योजना सुनेपछि मात्रै आफ्नो पहिलो निर्णय लिने तयारी गरेका छन् ।

हाल सिंहदरबारमा मन्त्रिपरिषद्को पहिलो बैठक जारी रहेकाले, बैठकबाट फर्किएपछि मात्रै मन्त्री पोखरेलले आफ्नो पहिलो निर्णय सार्वजनिक गर्ने सम्भावना रहेको स्रोतले जनाएको छ ।

यसअघि भने मन्त्रीहरूले पदभार ग्रहणलगत्तै पहिलो निर्णय गर्ने चलन थियो। तर, बालेन नेतृत्वको सरकारका केही मन्त्रीहरूले पहिले सरकारको नीति तथा प्राथमिकता बुझेर मात्रै निर्णय गर्ने रणनीति अपनाउँदै उक्त परम्परामा परिवर्तन ल्याउन थालेका छन् ।

यद्यपि, केही मन्त्रीहरूले भने पुरानै शैलीअनुसार पदभारपछि तुरुन्तै पहिलो निर्णय गरिसकेका छन् ।