नर्भिक इन्टरनेशनल हस्पिटल ३४औँ वर्षमा प्रवेश, हालसम्म ५० लाखले लिए सेवा

काठमाडौं । नर्भिक इन्टरनेशनल हस्पिटल स्थापना भएको ३३ वर्ष पूरा गरी ३४औँ वर्षमा प्रवेश गरेको छ । अस्पतालले स्थापनाकालदेखि हालसम्म झण्डै ५० लाख बिरामीलाई सेवा दिएको जनाएको छ ।

अस्पतालका प्रमुख कार्यकारी अधिकृत अजयकुमार मिश्रका अनुसार उच्चस्तरीय स्वास्थ्य सेवा, दक्ष जनशक्ति र आधुनिक प्रविधिको संयोजनमार्फत अस्पतालले स्वदेशी तथा विदेशी नागरिकलाई गुणस्तरीय सेवा प्रदान गर्दै आएको छ । हालसम्म सातै महादेशका ४० भन्दा बढी देशका नागरिकले यहाँ उपचार सेवा लिएको अस्पतालले जनाएको छ ।

वार्षिकोत्सवका अवसरमा अस्पतालले प्रभातफेरी तथा रक्तदान कार्यक्रम आयोजना गरेको छ । साथै, हाल २ सय शय्या स्वीकृतिप्राप्त अस्पतालले अत्याधुनिक नयाँ भवन निर्माण गरिरहेको र भवन सम्पन्न भएपछि क्षमता ३ सय शय्यामा पुग्ने जनाएको छ ।

अस्पतालले पछिल्लो समय मुटु, मस्तिष्क, मेरुदण्ड, कलेजो, आईभीएफ, क्यान्सर, आपतकालीन सेवा लगायत विभिन्न जटिल रोगहरूको सफल उपचार गर्दै आएको जनाएको छ । डिजिटल सेवा विस्तार गर्दै बिरामीमैत्री स्वास्थ्य सेवा प्रणालीलाई पनि प्राथमिकता दिइएको अस्पतालको भनाइ छ ।

सामाजिक उत्तरदायित्व अन्तर्गत स्वास्थ्य शिविर, तालिम, सामुदायिक अस्पतालसँग सहकार्य तथा विभिन्न जनचेतनामूलक कार्यक्रम सञ्चालन गर्दै आएको अस्पतालले जनाएको छ ।