बोर्डमा मन्त्रीको एक्सन: ४५ दिनभित्र कक्षा १२ नतिजा निकाल्न निर्देशन, नसके मार्गप्रशस्त गर्न चेतावनी

काठमाडौं । शिक्षा, विज्ञान तथा प्रविधि मन्त्री सस्मित पोखरेल ले शुक्रबार राष्ट्रिय परीक्षा बोर्ड को अनुगमन गर्दै कक्षा १२ को परीक्षा व्यवस्थापन, नतिजा प्रकाशन र कार्यशैलीबारे कडा निर्देशन दिएका छन् ।

कक्षा १२ को बोर्ड परीक्षा नजिकिँदै गर्दा मन्त्री पोखरेल बोर्डको कार्यालय सानोठिमी पुगेर तयारी अवस्थाबारे जानकारी लिएका हुन् । अनुगमनमा चुडामणि पौडेल पनि सहभागी थिए ।  संयुक्त अनुगमनपछि आयोजित कार्यक्रममा बोर्डका सदस्य सचिव जंगबहादुर अर्याल ले हालसम्म भएका काम, परीक्षा तयारी तथा आगामी योजनाबारे जानकारी गराएका थिए ।

त्यसैगरी बोर्डकी सहसचिव तथा प्रशासन प्रमुख जयन्ती सत्याल ले बोर्डभित्र अझै केही कार्यप्रणाली पुरानै ढाँचामा सञ्चालन भइरहेकाले समयअनुसार सुधार, प्रविधिमैत्री सेवा, छिटो निर्णय प्रक्रिया र सेवाग्राहीमैत्री व्यवस्थापन आवश्यक रहेको बताइन् । उनले बदलिँदो शैक्षिक आवश्यकता र विद्यार्थी–अभिभावकको अपेक्षाअनुसार बोर्डलाई अझ प्रभावकारी, उत्तरदायी र आधुनिक बनाउनु पर्नेमा जोड दिइन् ।

कार्यक्रममा शिक्षा सचिव पौडेलले सरकारको गति, जनअपेक्षा र नयाँ पुस्ताको चाहनाअनुसार बोर्डले काम गर्नुपर्ने बताएका थिए । उनले परिणाम दिन नसक्ने, ढिलासुस्ती गर्ने र जिम्मेवारी पूरा गर्न नसक्ने अवस्था आए मार्गप्रशस्त गर्नसमेत तयार रहन चेतावनी दिएका थिए ।

उनले भने, “सरकार जुन गतिमा अघि बढिरहेको छ, हामीले पनि त्यही गतिमा काम गर्नुपर्छ । काम गर्न सकिँदैन भने मार्गप्रशस्त गर्नुपर्छ ।”

त्यसैगरी मन्त्री पोखरेलले अब भाषणभन्दा काम गरेर देखाउने समय आएको भन्दै बोर्ड नेतृत्वलाई स्पष्ट निर्देशन दिएका थिए । उनले कक्षा १२ को नतिजा ४५ दिनभित्र सार्वजनिक गर्ने स्पष्ट निर्देशन दिँदै सोहीअनुसार कार्ययोजना बनाएर तत्काल काम अघि बढाउन निर्देशनसमेत दिएका हुन् ।

मन्त्रीले भने, “अब आलटाल गर्ने बेला सकियो । परिणाममुखी भएर काम गर्नुपर्छ । समयमै नतिजा दिनैपर्छ ।”  त्यसैगरी मन्त्रीले कक्षा १२ को नतिजा पारदर्शी, निष्पक्ष, त्रुटिरहित र तोकिएको समयभित्रै सार्वजनिक हुने व्यवस्था मिलाउन निर्देशन दिएका छन् ।