त्रिविमा एकैचोटि सबै शीर्ष पदाधिकारीको राजीनामा

काठमाडौं । त्रिभुवन विश्वविद्यालयका उपकुलपतिसहित शीर्ष पदाधिकारीहरूले सामूहिक राजीनामा दिएका छन् ।

रास्वपा नेतृत्वको सरकारलाई काम गर्न सहज बनाउने उद्देश्यसहित उपकुलपति प्रा.डा. दीपक अर्याल, शिक्षाध्यक्ष खड्ग केसी र रजिष्टार केदारप्रसाद रिजालले पद त्याग गरेका हुन् ।

शिक्षाध्यक्ष केसीले नेपाल प्रेससँग कुरा गर्दै आफूहरू मूलतः कक्षाकोठामा केन्द्रित प्राध्यापक भएकाले नयाँ सरकारलाई सहज वातावरण सिर्जना गर्न राजीनामा दिएको बताएका छन् ।

हालै सिफारिस गरिएको अध्यादेशमा विश्वविद्यालयका पदाधिकारी हटाउन सक्ने प्रावधान राखिएको र सत्तारुढ दलका केही नेताबाट पनि त्यस्तै संकेत देखिएपछि पदाधिकारीहरूले बिहीबार कुलपति बालेन्द्र शाहसमक्ष राजीनामा बुझाएका हुन् ।

उपकुलपति अर्याललाई केपी शर्मा ओलीको कार्यकालमा नियुक्त गरिएको थियो भने शिक्षाध्यक्ष केसी र रजिष्टार रिजाललाई पुष्पकमल दाहाल नेतृत्वको सरकारका बेला मेरिटका आधारमा जिम्मेवारी दिइएको थियो ।

यस घटनाले विश्वविद्यालय नेतृत्वमा एकैचोटि ठूलो खालीपन सिर्जना गरेको छ भने अब नयाँ नियुक्ति प्रक्रिया कसरी अघि बढ्छ भन्ने विषयमा चासो बढेको छ ।