नेपालका हजारौं माविमध्ये उत्कृष्ट १७ औँ स्थानमा मनास्लु वर्ल्ड कलेज

काठमाडौंको चाबहिल–चुच्चेपाटीमा अवस्थित मनास्लु वर्ल्ड कलेज यस वर्ष देशभरका ४ हजार ९ सय २४ माविमध्ये उत्कृष्ट १७औँ स्थानमा पर्न सफल भएको छ । एजुकेशन समाचारले सार्वजनिक गरेको नेपालका अब्बल माविहरुको सूचीमा मनास्लुले लगातार आफ्नो उपस्थिति मजबुत बनाउँदै लगेको हो । गत वर्ष उत्कृष्ट २० भित्र परेको मनास्लुले यस वर्ष अझ सुधारिएको नतिजासहित आफूलाई टप १७ मा उभ्याएको छ ।

छोटो समयमै शैक्षिक क्षेत्रमा प्रभावशाली पहिचान बनाउन सफल मनास्लु आज काठमाडौं उपत्यकामा विद्यार्थी तथा अभिभावकको बढ्दो आकर्षणको केन्द्र बन्दै गएको छ । ‘अ होम फर फ्युचर लिडर्स’ भन्ने मूल मन्त्रसहित अघि बढिरहेको यस कलेजले परम्परागत घोकन्ते शिक्षाभन्दा फरक सोच, व्यवहारिक सिकाइ र विद्यार्थीको समग्र व्यक्तित्व विकासलाई प्राथमिकतामा राख्दै आएको छ ।

वि.सं. २०५३ मा प्राक्सिस इन्टरनेशनल स्कुलका रूपमा सुरु भएको संस्था वि.सं. २०७७ देखि मनास्लु वर्ल्ड स्कुल तथा कलेजका रूपमा सञ्चालन हुँदै आएको छ । सोही वर्षदेखि कक्षा ११ र १२ अध्यापन सुरु गरेको मनास्लुले हाल विज्ञान, व्यवस्थापन, मानविकी तथा कानुन संकायमा अध्ययन अध्यापन गराउँदै आएको छ ।

मनास्लुले शिक्षालाई केवल पाठ्यपुस्तक र परीक्षासँग सीमित राखेको छैन । यहाँ प्रत्येक विद्यार्थीको क्षमता, रुचि र सम्भावनालाई बुझेर त्यसलाई निखार्ने वातावरण निर्माण गरिएको छ । कलेजका प्रिन्सिपल एवं संस्थाका अध्यक्ष गेन्द्र लामाका अनुसार मनास्लुको लक्ष्य विद्यार्थीलाई केवल राम्रो अंक दिलाउने होइन, उनीहरूलाई आत्मविश्वासी, सिर्जनशील र नेतृत्व गर्न सक्ने व्यक्तित्वका रूपमा तयार गर्नु हो ।

‘यदि कुनै विद्यार्थी पढाइमा कमजोर छ भने हामी उसलाई सुरुदेखि नै विशेष निगरानी र अतिरिक्त सहयोगमार्फत अघि बढाउने प्रयास गर्छौं,’ लामा भन्छन्, ‘तर उत्कृष्टता भनेको केवल अंक मात्रै होइन । कसैमा खेलकुदको क्षमता हुन्छ, कसैमा कला, कसैमा नेतृत्व गर्ने क्षमता । हामी विद्यार्थीभित्र रहेको त्यही विशेषतालाई पहिचान गरेर अझ निखार्ने काम गर्छौं ।’

आईएसओ सर्टिफाइड संस्था रहेको मनास्लुले आधुनिक भौतिक पूर्वाधार, प्रविधिमैत्री कक्षाकोठा, अनुशासित वातावरण र विद्यार्थीमैत्री शिक्षण प्रणालीलाई बलियो बनाउँदै आएको छ । अध्ययनसँगै अतिरिक्त क्रियाकलाप, नेतृत्व विकास, सार्वजनिक प्रस्तुतीकरण र सिर्जनात्मक अभ्यासमा समेत उत्तिकै जोड दिइएकाले विद्यार्थीले कक्षाकोठाभन्दा बाहिर पनि सिक्ने अवसर पाउने गरेका छन् ।

मनास्लुका विद्यार्थीले राष्ट्रिय परीक्षा बोर्डको नतिजामा मात्र होइन, एमबीबीएस, इन्जिनियरिङलगायत प्रतिस्पर्धात्मक प्रवेश परीक्षामा समेत उल्लेखनीय सफलता हासिल गर्दै आएका छन् । भारतीय दूतावासमार्फत प्रदान गरिने शतप्रतिशत छात्रवृत्तिमा समेत मनास्लुका विद्यार्थी छनोट हुँदै आएका छन् । कलेजका अनुसार कक्षा ११ र १२ को अध्ययनलाई केवल बोर्ड परीक्षासँग सीमित नराखी विद्यार्थीको त्यसपछिको लक्ष्य र करिअरसँग जोडेर तयारी गराइन्छ ।

देशभरका उत्कृष्ट माविहरुको छनोट गर्ने क्रममा एजुकेशन समाचारले राष्ट्रिय परीक्षा बोर्डको पछिल्ला तीन वर्षको कक्षा १२ को नतिजालाई मुख्य आधार बनाएको थियो । त्यससँगै भौतिक पूर्वाधार, अतिरिक्त क्रियाकलाप, स्थापना वर्ष, उत्कृष्ट माविको पुरस्कार तथा पब्लिक पर्सेप्सनलाई समेत मूल्यांकनको आधार बनाइएको थियो । यही प्रतिस्पर्धात्मक मूल्यांकनमा मनास्लु वर्ल्ड कलेजले देशभरकै उत्कृष्ट १७औँ माविका रूपमा आफ्नो स्थान सुरक्षित गर्न सफल भएको हो ।