कक्षा ११ को पढाइ असार १ गतेदेखि सुरु गर्न निर्देशन

शिक्षा तथा मानव स्रोत विकास केन्द्र (CEHRD) ले कक्षा ११ को पठनपाठन असार १ गतेदेखि सुरु गर्न निर्देशन दिएको छ ।

केन्द्रले शिक्षा, विज्ञान तथा प्रविधि मन्त्रालयको निर्णयअनुसार २०८३ सालको माध्यमिक शिक्षा परीक्षा (SEE) को नतिजा प्रकाशन भइसकेपछि कक्षा ११ को पढाइ वि.सं. २०८३ असार १ गतेबाट सञ्चालन गर्न सबै शिक्षा विकास तथा समन्वय इकाइलाई पत्राचार गरेको हो ।

केन्द्रद्वारा जारी पत्रमा सूचना प्रवाह तथा आवश्यक समन्वय गरी निर्णय कार्यान्वयन गर्न आग्रह गरिएको छ ।

यस्तै, स्थानीय तह तथा विद्यालयहरूलाई आवश्यक सहजीकरण गरी सोहीअनुसार कक्षा सञ्चालन गर्नसमेत अनुरोध गरिएको छ ।

शिक्षा तथा मानव स्रोत विकास केन्द्रले २०८३ वैशाख ६ गते जारी गरेको पत्रमा विद्यालय शिक्षाको शैक्षिक गतिविधिलाई नियमित र व्यवस्थित बनाउन यस्तो निर्देशन दिएको उल्लेख छ ।