शिक्षामा २ खर्ब १८ अर्ब ३० करोड विनियोजन

काठमाडौं । सरकारले आर्थिक वर्ष २०८३/०८४ का लागि शिक्षा, विज्ञान तथा प्रविधि क्षेत्रका लागि २ खर्ब १८ अर्ब ३० करोड रुपैयाँ बजेट विनियोजन गरेको छ।

शुक्रबार संघीय संसद्को संयुक्त बैठकमा आगामी आर्थिक वर्षको बजेट प्रस्तुत गर्दै अर्थमन्त्री डा. स्वर्णिम वाग्लेले शिक्षा क्षेत्रका लागि उक्त बजेट विनियोजन गरिएको जानकारी दिए।

सरकारले विद्यालय शिक्षाको गुणस्तर सुधार, प्राविधिक तथा व्यावसायिक शिक्षाको विस्तार, उच्च शिक्षामा पहुँच अभिवृद्धि, अनुसन्धान तथा नवप्रवर्तन प्रवर्द्धन, शिक्षक क्षमता विकास तथा शैक्षिक पूर्वाधार सुदृढीकरणलाई प्राथमिकतामा राख्दै बजेट विनियोजन गरेको जनाएको छ।

बजेटमार्फत विद्यालय शिक्षा क्षेत्र सुधार, विश्वविद्यालयहरूको क्षमता अभिवृद्धि, डिजिटल शिक्षाको विस्तार तथा सीपमूलक शिक्षालाई थप प्रभावकारी बनाउने कार्यक्रम अघि सारिएको अर्थमन्त्री वाग्लेले बताए।

शिक्षा क्षेत्रका लागि छुट्याइएको बजेट कुल राष्ट्रिय बजेटको महत्वपूर्ण हिस्सा रहेको सरकारको दाबी छ। आगामी आर्थिक वर्षमा शिक्षा क्षेत्रमा घोषणा गरिएका कार्यक्रम तथा योजनाले शैक्षिक गुणस्तर सुधारमा टेवा पुग्ने अपेक्षा गरिएको छ।