विश्व वातावरण दिवसमा ग्रीन आर्मीको विशेष कार्यक्रम, वातावरण संरक्षणसँगै विद्यार्थीको नेतृत्व विकासमा जोड

काठमाडौं । विश्व वातावरण दिवसको अवसरमा ग्रीन आर्मी नेपालले वातावरण संरक्षण, विद्यार्थी नेतृत्व विकास तथा खेलकुद प्रवद्र्धनलाई केन्द्रमा राखेर विशेष कार्यक्रम सम्पन्न गरेको छ । कार्यक्रममा प्रमुख अतिथि गोकर्णेश्वर नगरपालिका प्रमुख दीपक रिसालले वातावरण संरक्षणका क्षेत्रमा ग्रीन आर्मी नेपालले पुर्‍याउँदै आएको योगदान उल्लेखनीय रहेको बताएका छन् ।

कार्यक्रमलाई सम्बोधन गर्दै प्रमुख अतिथि रिसालले ग्रीन आर्मीले गोकर्णेश्वरलाई मुख्य आधार क्षेत्र बनाएर वातावरण संरक्षणका गतिविधिलाई प्रभावकारी रूपमा अगाडि बढाएको बताए । वातावरणीय अभियानसँगै सामाजिक उत्तरदायित्वका क्षेत्रमा समेत संस्थाले महत्वपूर्ण भूमिका निर्वाह गर्दै आएको उल्लेख गर्दै उनले जेनजी आन्दोलनका बेला उत्पन्न सुरक्षा चुनौतीका समयमा ग्रीन आर्मीले गरेको सहयोगको प्रशंसा गरे ।

ग्रीन आर्मी नेपालका संस्थापक तथा चिफ सविन शर्माले संस्थाले वातावरण संरक्षणलाई मात्र नभई विद्यार्थीको प्रतिभा पहिचान, नेतृत्व विकास र क्षमता अभिवृद्धिलाई समेत प्राथमिकतामा राखेर काम गर्दै आएको बताए । युवालाई सकारात्मक गतिविधिमा सहभागी गराउँदै जिम्मेवार नागरिक निर्माण गर्ने उद्देश्यका साथ देशभर अभियान सञ्चालन भइरहेको उनको भनाइ थियो ।

कार्यक्रममा स्वागत मन्तव्य राख्दै ग्रीन आर्मी नेपालका सल्लाहकार हरिकृष्ण श्रेष्ठले विद्यार्थीलाई अनुशासित बनाउने र वातावरण संरक्षणप्रति उत्तरदायी बनाउने उद्देश्यका साथ पाँच विद्यालयबाट अभियान सुरु गरिएको बताए। सुरुआतमा सीमित क्षेत्रबाट सुरु भएको अभियान अहिले देशव्यापी रूपमा विस्तार भइसकेको उनले जानकारी दिए ।
कार्यक्रमका क्रममा एसईई उत्तीर्ण विद्यार्थीहरूलाई सम्मान गरिएको थियो । साथै, ग्रीन आर्मी नेपालले आयोजना गरेको फुटसल तथा बास्केटबल प्रतियोगितामा उत्कृष्ट प्रदर्शन गर्ने प्रथम, द्वितीय र तृतीय स्थान हासिल गर्ने टोली तथा खेलाडीहरूलाई ट्रफी, मेडल र प्रमाणपत्र प्रदान गरिएको थियो ।

कार्यक्रममा ग्रीन आर्मी रनिङ सिल्डको उपाधि कपनस्थित बोधीसदन सेकेण्डरी स्कुलले हात पारेको थियो । त्यस्तै, दोस्रो रनिङ सिल्ड सेलिब्रेसन को एड र क्रिश्चियन कम्युनिटी स्कुल तेस्रो रनिङ सिल्ड चुमेको थियो ।

विश्व वातावरण दिवसको अवसरमा आयोजित उक्त कार्यक्रमले वातावरण संरक्षणप्रति जनचेतना अभिवृद्धि गर्नुका साथै विद्यार्थीमा नेतृत्व क्षमता, अनुशासन, खेलकुद भावना र सामाजिक उत्तरदायित्वको विकासमा टेवा पुर्‍याएको आयोजकले जनाएको छ ।